دفتر خارجہ سے بھارت میں 11 پاکستانی ہندوں کے قتل کی تحقیقاتی رپورٹ طلب

دفتر خارجہ بتائے کہ قتل ہونے والے ہندوں کے خاندان کی کیا معاونت کی گئی ہے، سپریم کورٹ
اسلام آباد(آئی این پی ) سپریم کورٹ نے دفتر خارجہ سے بھارت میں 11 پاکستانی ہندوں کے قتل کی تحقیقاتی رپورٹ طلب کر تے ہوئے کہا ہے کہ دفتر خارجہ بتائے کہ قتل ہونے والے ہندوں کے خاندان کی کیا معاونت کی گئی ہے۔ بدھ کو سپریم کورٹ میں بھارت میں قتل کیے جانے والے 11 پاکستانی ہندوں کے کیس کی سماعت ہوئی۔ سپریم کورٹ نے دفتر خارجہ سے اس قتل کی تحقیقاتی رپورٹ طلب کر لی۔ ڈپٹی اٹارنی جنرل نے بتایا کہ دفتر خارجہ نے 11 ہندوں کے قتل پر بھارت سے پوسٹ مارٹم رپورٹ مانگی ہے، ڈاکٹر رمیش کمار کو دفتر خارجہ نے تمام تر تعاون کا یقین دلایا ہے۔ وکیل درخواست گزار قلب حسن نے کہا کہ بھارت کے ساتھ صرف اس معاملے پر بات چیت نہیں کرنی بلکہ اس معاملے کی تحقیقات کی جانی چاہئے۔ سپریم کورٹ نے کہا کہ دفتر خارجہ بتائے کہ قتل ہونے والے ہندوں کے خاندان کی کیا معاونت کی گئی ہے؟ دفتر خارجہ بھارت کے ساتھ ہونے والے رابطے اور اقدامات کا تحریری جواب عدالت میں جمع کرائے۔ کیس کی سماعت غیر معینہ مدت کے لیے ملتوی کر دی گئی۔