اسلام آباد :)سپریم کورٹ پاکستان نے موٹروے پر موٹرسائیکل چلانے کی اجازت کیخلاف حکومت کی درخواست مسترد کرتے ہوئے فریقین سے جواب طلب کرلیا ہے۔
جسٹس مشیر عالم کی سربراہی3 رکنی بنچ نے حکومت کی درخواست پرسماعت کی جس میں استدعا کی گئی تھی کہ اسلام آباد ہائی کورٹ کا فیصلہ معطل کیا جائے۔بینچ کے رکن جسٹس منصورعلی شاہ نے استفسار کیا کہ کیا قانون میں موٹروے پر موٹرسائیکل چلانے پر پابندی ہے؟ ۔ایڈیشنل اٹارنی جنرل عامر رحمان نے بتایا کہ نیشنل ہائی وے سیفٹی آرڈیننس کے مطابق موٹروے پر موٹرسائیکل نہیں چل سکتی۔جسٹس منصور علی شاہ نے کہا کہ قانون کے مطابق پابندی کا نوٹیفکیشن وجوہات کیساتھ جاری کرنا لازم ہے،
دنیا بھر کی موٹر ویز پر موٹرسائیکلز چلتی ہیں، اگر حکومت نے پابندی عائد کی ہے تو نوٹیفکیشن دکھائیں۔حکومت کی طرف سے ایڈیشنل اٹارنی جنرل نے بتایا کہ پابندی کیلئے باضابطہ نوٹیفکیشن جاری نہیں ہوا تاہم موٹروے کے انٹری پوائنٹس پر پابندی کے سائن بورڈ لگائے گئے ہیں۔عدالت کو آگاہ کیا گیا کہ موٹرسائیکل پر سیفٹی اور سکیورٹی کی وجہ سے پابندی عائد کی گئی۔ چین، انڈونیشیا اور فلپائن میں موٹرسائیکلز موٹروے پر لانے پر پابندی ہے،جسٹس منصور علی شاہ نے کہا کہ ہائی وے پر موٹرسائیکل زیادہ خطرناک ہو سکتی ہے کیا وہاں پر حکومت کو شہریوں کی سیفٹی کی پرواہ نہیں وہاں تو سائیکلیں بھی چل رہی ہوتی ہیں۔
جسٹس مشیر عالم نے کہا کہ حکومت کو اختیار ہے موٹروے پر موٹرسائیکلز کی آمد کو ریگولیٹ کرے۔درخواستگزار کے وکیل نے بتایا کہ موٹرسائیکلز کو 2010میں تین سال کیلئے اجازت دی گئی تھی، اسلام آباد ہائی کورٹ کے فیصلے کے مطابق موٹروے پر چنگ چی بھی چل سکتی ہے۔عدالت نے فریقین کو نوٹس جاری کرتے ہوئے سماعت دس دن کیلئے ملتوی کر دی ۔ حکومت نے اسلام آباد کا مذکورہ فیصلہ مارچ2019میں چلنج کیا تھا جس پر سماعت جاری ہے۔خیال رہے کہ دسمبر2018میں اسلام آباد ہائی کورٹ نے 600یا اس سے زائد سی سی انجن رکھنے والی ہیوی بائیکس کو موٹروے پر چلانے کی اجازت دی تھی۔
محکمہ قومی شاہرات کو حکم دیا تھا کہ ہیوی بائیکرز کو خصوصی کارڈ جاری کیے جائیں جن کو ٹریفک قوانین توڑنے کی صورت میں منسوخ کیا جاسکے۔ عدالت نے حکم دیا تھا کہ رفتار110کلومیٹر فی گھنٹہ سے زیادہ نہیں ہونی چاہئے۔اسلام آباد ہائی کورٹ نے ہدایت کی تھی ڈرائیور کی عمر 30سال سے کم ہونے یا ون ویلنگ کی صورت میں کارڈ چھ ماہ کیلئے منسوخ کر دیا جائے گا۔ ہیوی بائیکرز کو تیسری لین میں جانے کی اجازت بھی نہیں ہوگی۔
