چاہے حکومت چلی جائے پیسے واپس ملنے تک انہیں نہیں چھوڑیں گے، وزیراعظم

l_234516_115854_updates.jpg

وزیراعظم عمران خان کا کہنا ہےکہ جیب کترے مجھ پردباؤ ڈال رہے ہیں کہ این آر او نہ دیا تو حکومت گرادیں گے،  چاہے اقتدار چلا جائے انہیں این آر او نہیں دوں گا۔

ایک نجی ٹی وی چینل کو انٹرویو میں وزیراعظم عمران خان کا کہنا تھا کہ اپوزیشن نے فنانشل ایکشن ٹاسک فورس (فیٹف)  بل میں بلیک میل کیا اور دوسری طرف یہ جھوٹ بول رہے ہیں کہ کون این آر او مانگ رہا ہے۔

وزیراعظم کاکہنا تھاکہ چاہے میری حکومت بھی چلی جائے پیسے واپس ملنے تک انہیں نہیں چھوڑیں گے، ان سب کو خطرہ ہےکہ یہ لوگ جیلوں میں جائیں گے، انہوں نے اربوں روپے کی زمینوں پر قبضے کیے ہوئے ہیں، ان کی سیاست کا مقصد پیسہ بچانا ہے۔

عمران خان کا کہنا  تھا کہ یہ کہتے ہیں کہ قومی احتساب بیورو (نیب) ختم کردو تاکہ ان کےکیس ختم ہوجائیں، ملک میں اقتدار میں آؤ اور پیسہ بناؤ کا سسٹم بن گیا تھا،یہ چاہتے ہیں کہ پیسہ بنائیں اور کوئی پکڑے بھی نہیں۔

عمران خان کا کہنا تھا کہ سارے کیس ان دونوں پارٹیوں نے ایک دوسرے کے خلاف بنائے ہیں ہم نے نہیں،آصف زرداری کو نواز شریف نے جیل میں ڈالا، ہمارے دور میں صرف شہباز شریف پرکیس بنا۔

وزیراعظم کاکہنا تھا کہ اپنی انا ختم کرکے ملک کےلیے قرضے مانگے ہیں، کورونا کے دوران وزیراعظم ہاؤ س کے خرچے 30 فیصدکم کیے گئے ہیں۔

شیئر کریں

Top