‘ممی سو رہی ہیں’، کم سن بچیاں مردہ ماں کے ساتھ کئی دن بیٹھی رہیں

265518_2005568_updates.jpg

فرانس میں ماں کے انتقال سے بے خبر 2 معصوم کم سن بچیاں کئی روز تک سمجھتی رہیں کہ ان کی والدہ سو رہی ہیں۔

فرانسیسی خبر رساں ادارے اے ایف پی کے مطابق یہ دل سوز واقعہ فرانس کے شہر رینس میں پیش آیا جہاں ایک گھر میں خاتون اچانک چل بسیں، خاتون کی دو بیٹیاں’جن کی عمر 5 اور 7 سال ہے’ یہی سمجھتی رہیں کہ ان کی والدہ سورہی ہیں۔

خبر ایجنسی کے مطابق بچیوں کے بغیر اطلاع کے طویل غیرحاضری پر اسکول کی جانب سے پولیس کو اطلاع دی گئی، جب پولیس گھر پر پہنچی تو بچیوں نے پولیس اہلکاروں سے کہا کہ ‘خاموش رہو، امی سورہی ہیں’،تاہم پولیس اہلکار اصرار کرکے گھر کے اندر داخل ہوئے تو انہیں خاتون کی لاش ملی۔

ابتدائی پوسٹ مارٹم رپورٹ کے مطابق خاتون کی موت طبعی تھی، پولیس کا کہنا ہے کہ 31 سالہ خاتون کا آبائی تعلق افریقی ملک آئیوری کوسٹ سے تھا۔

دونوں بچیوں کو ابتدائی طور پر اسپتال منتقل کیا گیا جہاں ان کے طبی معائنے کے بعد انہیں بچوں کی دیکھ بھال کے ادارے میں منتقل کردیا گیا۔

پولیس کا کہنا ہے کہ فی الحال تحقیقات میں یہ واضح نہیں ہوسکا کہ خاتون کی موت کو کتنا عرصہ گزرا تھا، واقعے کے مجرمانہ پہلو پر تفتیش نہیں کی جارہی، چند دن انتظار کررہے ہیں پھر بچیوں سے بیان لینے کی کوشش کریں گے۔

شیئر کریں

Top