کیوبا میں تیل ذخیرہ کرنے والے ٹینکر پر آسمانی بجلی گرگئی، 1 ہلاک، 121 زخمی

123-50.jpg

ہوانا(ویب ڈیسک)کیوبا میں آسمانی بجلی تیل ذخیرہ کرنے والے ٹینکر پر گرنے سے خوفناک آتشزدگی ہوئی جس میں سیکڑوں افراد زخمی جبکہ متعدد لاپتہ ہوگئے۔
غیر ملکی میڈیا کے مطابق کیریبین ملک کیوبا میں آتشزدگی کا خوفناک حادثہ پیش آیا جس کے نتیجے میں ایک شخص ہلاک جب کہ سیکڑوں زخمی ہوگئے۔
کیوبن حکام کا کہنا ہے کہ مٹنزاز نامی شہر میں موجود تیل ذخیرہ کرنے والے ٹینکر پر آسمانی بجلی گرنے کے بعد ہولناک آگ بھڑک اٹھی جس کی لپیٹ میں آکر ایک شخص موقع پر ہی ہلاک ہوگیا۔
حکام کا کہنا ہے کہ آسمانی بجلی گرنے سے ٹینکر میں چار دھماکے ہوئے جس کی زد میں آکر 121 افراد جھلس گئے جب کہ ریسکیو آپریشن کرنے والے 17 فائر فائٹرز لاپتہ ہوگئے۔
غیر ملکی حکام کا کہنا ہے کہ غیر شناخت شدہ لاش برآمد ہوئی ہے۔
حکام کے مطابق اتنی شدید ہے کہ دو روز سے قابو پانے کی کوشش جاری ہے اس کے باوجود آگ کی شدت میں کمی نہیں آرہی۔

بنگلادیش؛ پٹرولیم مصنوعات میں 52 فیصد اضافے پر ہنگامے پھوٹ پڑے

123-49.jpg

ڈھاکا(ویب ڈیسک) بنگلادیش میں پٹرولیم مصنوعات کی قیمتیں تاریخ کی بلند ترین سطح پر پہنچنے کے بعد ہنگامے پھوٹ پڑے اور ہزاروں مظاہرین نے فیول اسٹیشنز کا گھیراؤ کرلیا۔
عالمی خبر رساں ادارے کے مطابق بنگلادیش کی حکومت نے پٹرول کی قیمت میں 51.7 فیصد اور ڈیزل کی قیمت میں 42.5 فیصد اضافے کا اعلان کیا ہے۔ پٹرول 89 ٹکا سے بڑھ کر 135 ٹکا ہوگیا جب کہ ڈیزل کی قیمت 114 ٹکا ہوگئی۔
وزارت پٹرولیم کا کہنا ہے کہ ریٹیل سطح پر قیمتوں میں تازہ ترین اضافہ تیل کی سرکاری تقسیم کار کمپنیوں پر سبسڈی کے بوجھ کو کم کرنے کے لیے ہے۔ ملک زیادہ سبسڈی کا متحمل نہیں ہوسکتا۔
خیال رہے کہ بنگلادیش کی تاریخ میں پٹرولیم مصنوعات کی قیمتوں میں یہ بلند ترین اضافہ ہے۔ جس کے بعد ملک بھر میں ہنگامے پھوٹ پڑے اور ہزاروں مظاہرین نے فیول اسٹیشنز کا گھیراؤ کرلیا۔
مظاہرین نے اس اضافے کو بدترین مہنگائی لانے والی سونامی قرار دیتے ہوئے حکومت سے قیمتیں فی الفور کم کرنے کا مطالبہ کیا۔ کئی مقامات پر پولیس اور مظاہرین کے درمیان جھڑپ بھی ہوئی۔
بنگلادیش نے حال ہی میں 4 ارب ڈالر کے قرض کے لیے آئی ایم ایف میں درخواست جمع کرائی ہے۔
بنگلادیش کے وزیر خزانہ کا کہنا ہے کہ معیشت مستحکم ہے تاہم یوکرین روس جنگ کے بعد سے پٹرول مصنوعات کی قیمتوں تیزی سے اضافے اور ڈالر کی اونچی پرواز سے ادائیگیوں کے توازن میں مشکلات کا سامنا ہے۔

پسند کی شادی کی خواہش؛باپ نے بیٹی کے قتل کیلیے ایک لاکھ روپے سپاری دیدی

123-48.jpg

اتر پردیش(ویب ڈیسک) بھارت میں پسند کی شادی کرنے کی ضد کرنے والی بیٹی کو قتل کرانے کے لیے باپ نے ملزم کو 1 لاکھ روپے کی سپاری دیدی۔
بھارتی خبر رساں ادارے کے مطابق ریاست اُتر پردیش میں باپ کے منع کرنے کے باوجود محبوب سے ملنے اور شادی کرنے پر بضد لڑکی کو اسپتال میں زہریلا انجیکشن دیکر قتل کرنے کی کوشش کی گئی۔
لڑکی کی اچانک طبیعت بگڑ گئی لیکن خوش قسمتی سے اس وقت ماہر ڈاکٹر موجود تھے جنھوں نے لڑکی کو بچالیا۔ لڑکی کے خون میں پوٹاشیئم کلورائیڈ کی مقدار خطرناک حد تک پائی گئی تھی۔
ڈاکٹرز نے پولیس کو بلایا اور ممکنہ قتل کے خدشے کا اظہار کیا۔ جس پر سی سی ٹی وی فوٹیجز کی مدد سے میل نرس نریش کمار کو گرفتار کرلیا گیا جو ڈاکٹر کا بھیس بدل کر لڑکی کو انجیکشن لگا رہا تھا۔
پولیس نے وارڈ بوائے کو حراست میں لیکر پوچھ گچھ کی تو وارڈ بوائے نے انکشاف کیا کہ اس نے یہ سب لڑکی کے باپ نوین کمار کے کہنے پر کیا۔
پولیس نے لڑکی کے باپ کو بھی حراست میں لے لیا جس نے اعترافی بیان میں بتایا کہ بیٹی اپنی پسند کی شادی کرنا چاہتی تھی اور بار بار منع کرنے کے باوجود اس سے ملتی تھی۔
جس پر میں نے بیٹی کو بہانے سے اسپتال میں داخل کروایا اور وارڈ بوائے کو زہریلا انجیکشن لگا کر قتل کرنے کے لیے 1 لاکھ روپے بھی دیئے۔

روس اور ترکی کے صدور کی ایک ماہ میں دوسری اہم ملاقات

123-32.jpg

ماسکو(ویب ڈیسک) ترک صدر طیب اردوان اور روسی صدر ولادیمیر پوٹن کے درمیان ایک ماہ سے بھی کم عرصے میں دوسری اہم ملاقات بحیرۂ اسود کے ساحل پر واقع روس کے سیاحتی شہر سوچی میں ہوئی۔
عالمی خبر رساں ادارے کے مطابق روس کی جانب سے جاری بیان میں کہا گیا ہے کہ دونوں رہنماؤں نے موجودہ علاقائی اورعالمی چیلنجز کے باوجود باہمی تعلقات کو مزید فروغ دینے کے عزم کا اعادہ کیا۔
بیان میں یہ بھی کہا گیا ہے کہ دونوں رہنماؤں نے دوطرفہ تجارت میں اضافے سمیت اقتصادی اور توانائی کے شعبوں میں تعاون بڑھانے پر بھی اتفاق کیا اور شام میں دہشت گردی کے خلاف مشترکہ جنگ کے عزم کا اعادہ کیا۔
ملاقات کے بعد ایک مشترکہ بیان بھی جاری کیا گیا جس میں کہا گیا ہے کہ دونوں رہنماؤں نے روس سے اناج، کھاد اور دیگر خام اشیاء کی بلاروک ٹوک برآمد سمیت یوکرینی اناج کی برآمدات سے متعلق استنبول معاہدے کو مکمل طور پر نافذ کرنے پر زور دیا۔
خیال رہے کہ ترکی کی ثالثی میں گزشتہ ماہ استنبول میں یوکرین، روس اور اقوام متحدہ نے ایک معاہدے پر دستخط کیے تھے۔ جس کے تحت بحیرۂ اسود کی بندرگاہوں کے ذریعے یوکرین سے اناج کی برآمدات بحال ہوئی تھی۔

وائٹ ہاؤس؛ آسمانی بجلی گرنے سے 3 افراد ہلاک اور4 زخمی

123-31.jpg

واشنگٹن(ویب ڈیسک) امریکا میں وائٹ ہاؤس کے قریب آسمانی بجلی گرنے سے 3 افراد ہلاک اور 4 زخمی ہوگئے۔
غیر ملکی خبر رساں ادارے کے مطابق امریکی دارالحکومت میں واقع وائٹ ہاؤس کے نزدیک ایک پارک کے درخت پر اس وقت آسمانی بجلی گرگئی جب اس کے سائے تلے ایک جوڑا اپنی شادی کی 56 ویں سالگرہ منا رہا تھا۔
درخت پر آسمانی بجلی گرنے سے شادی کی سالگرہ منانے والے بزرگ جوڑے سمیت 3 افراد ہلاک اور 4 افراد شدید زخمی ہوگئے۔ ہلاک اور زخمی ہونے والوں کو اسپتال منتقل کردیا گیا۔
زخمیوں کی حالت تشویشناک ہونے کے باعث انتہائی نگہداشت کے وارڈ میں داخل کیا گیا ہے۔ ہلاکتوں میں اضافے کا خدشہ ظاہر کیا جا رہا ہے۔
وائٹ ہاؤس انتظامیہ کی جانب سے جاری بیان میں واقعے پر قیمتی جانوں کے نقصان پر افسوس کا اظہار کرتے ہوئے لواحقین سے تعزیت کا اظہار کیا ہے۔

اسرائیل کی غزہ پر وحشیانہ بمباری، 5سالہ بچی سمیت 15 فلسطینی شہید

123-30.jpg

اسرائیلی طیاروں کی غزہ پر وحشیانہ بمباری سے 5 سالہ بچی سمیت 15 سے زائد فلسطینی شہید جبکہ 100 سے زائد زخمی ہوگئے۔
غیر ملکی خبررساں ایجنسی کی رپورٹ کے مطابق اسرائیلی وزیراعظم یائر لیپڈ نے اپنے بیان میں کہا ہے کہ طیاروں نے جہادی تنظیم کے کمانڈر تیسیر الجبری کو نشانہ بنایا۔
صہیونی حملوں کے نتیجے میں شہید ہونے والے فلسطینوں کی شہادت میں اضافے کا خدشہ ہے جبکہ مقامی وزارت صحت کے حکام کا کہنا ہے کہ جاں بحق ہونے والوں میں ایک 5 سالہ بچی بھی شامل ہے۔دوسری جانب اسرائیل حملے کے جواب میں اسلامک جہاد نے شدید ردعمل دیتے ہوئے جوابی کارروائی کی اور اسرائیل پر 100 سے زائد میزائل داغے۔
فلسطین کی نمائندہ مزاحتمی تنظیم حماس نے بھی اپنے بیان میں کہا ہے کہ اسرائیل دوبارہ جنگی جرائم کا مرتکب ہوا جس کی اسے قیمت چکانی پڑے گی۔وزیراعظم شہباز شریف نے غزہ میں اسرائیلی بمباری پر شدید مذمت کرتے ہوئے کہا کہ 5 سالہ بچی سمیت 10 فلسطینیوں کی شہادت اسرائیلی دہشت گردی کا منہ بولتا ثبوت ہے، اسرائیل نتائج کی پراوہ کیے بغیر فلسطینوں کو نشانہ بنارہا ہے۔

ایمن الظواہری سے متعلق امریکی دعویٰ کی تحقیقات کررہے ہیں، طالبان

123-13.jpg

دوحہ(ویب ڈیسک)امریکا کی جانب سے القاعدہ کے سربراہ ایمن الظواہری کی ہلاکت سے متعلق دعویٰ پر طالبان نے کہا ہے کہ وہ واشنگٹن کے اس ’دعوے‘ کی تحقیقات کررہے ہیں۔
الجزیرہ کی رپورٹ کے مطابق طالبان کے ایک اہلکار نے بتایا کہ گروپ کی قیادت کو ایمن الظواہری کی موجودگی کا علم نہیں تھا۔
دوحہ میں مقیم اقوام متحدہ کے لیے طالبان کے نامزد نمائندے سہیل شاہین نے ایک پیغام میں صحافیوں کو بتایا کہ ’حکومت اور قیادت کو اس بات کا علم نہیں کہ امریکا کیا دعویٰ کررہا ہے اور نہ ہی اس کا کوئی سراغ ملا ہے۔
انہوں نے کہا کہ دعوے کی سچائی کے بارے میں جاننے کے لیے ابھی تحقیقات جاری ہیں۔ انہوں نے مزید کہا کہ تحقیقات کے نتائج عوامی طور پر شیئر کیے جائیں گے۔
گروپ کے تین ذرائع نے خبر رساں ادارے ’رائٹرز‘ کو بتایا کہ طالبان کے سرکردہ رہنما امریکی ڈرون حملے کا جواب دینے کے بارے میں طویل بات چیت کر رہے ہیں۔
خیال رہے کہ امریکا نے کہا تھا کہ اس نے ایمن الظواہری کو ڈرون سے فائر کیے گئے میزائل سے اس وقت ہلاک کیا جب وہ اتوار کو کابل میں واقع ایک خفیہ گھر کی بالکونی میں کھڑے تھے۔

ٹھنڈے چپس کیوں دیے؟ نوجوان نے ریسٹورنٹ ملازم کو گولی مار دی

123-12.jpg

نیویارک(ویب ڈیسک)امریکا میں ایک شخص نے نجی ریسٹورنٹ کے ملازم کو ٹھنڈے چپس دینے پر گولی مار دی، جس کے نتیجے میں ملازم زخمی ہوگیا۔
بین الاقوامی خبر رساں اداروں کے مطابق نیو یارک میں نجی فاسٹ فوڈ ریسٹورنٹ کے ملازم کو گولی مارنے والے شخص کو گرفتار کرلیا گیا ہے۔ پولیس کے مطابق بروکلن کے علاقے میں 20 سالہ مائیکل مورگن نے 23 سالہ ریسٹورنٹ ملازم کو گولی مار کر زخمی کردیا، جس کی حالت تشویش ناک بتائی جاتی ہے۔
مقامی ذرائع کے مطابق خوفناک واقعہ 40 سالہ خاتون اور ریسٹورنٹ ملازم کے مابین تکرار کے بعد شروع ہوا، جب ٹھنڈے چپس دینے پر خاتون نے اپنے بیٹے کو وڈیو کال کرکے شکایت کی، جس پر ملزم غصے میں ریسٹورنٹ آیا اور بحث کے دوران ملازم پر گولی چلادی۔
پولیس کا کہنا ہے کہ 20 سالہ مائیکل مورگن اس سے قبل بھی کئی جرائم میں ملوث رہا ہے، جس کی پاداش میں اسے متعدد بار گرفتار بھی کیا جا چکا ہے۔ پولیس نے مقدمے میں قتل کی کوشش اور لوڈڈ پستول رکھنے کے الزامات عائد کیے ہیں۔

عمرہ زائرین کیلیے پی سی آر ٹیسٹ اور ویکسی نیشن کی شرط ختم

123-11.jpg

ریاض(ویب ڈیسک)سعودی حکومت کی جانب سے عمرہ زائرین کے لیے اچھی خبریں آنے کا سلسلہ جاری ہے، جس کے مطابق حکام نے عازمین کے لیے ریپڈ پی آر سی ٹیسٹ اور ویکسی نیشن کی شرط بھی ختم کردی ہے۔
بین الاقوامی خبر رساں اداروں کے مطابق سعودی وزارت حج و عمرہ نے تصدیق کردی ہے کہ دیگر ممالک سے آنے والے عمرہ زائرین کو مملکت میں داخلے کے لیے منفی پی آر سی ٹیسٹ کے نتائج کی مزید ضرورت نہیں ہوگی، تاہم زائرین عمرہ کے لیے کووڈ میڈیکل انشورنس اسکیم حاصل کرنا لازمی قرار دیا گیا ہے۔
حکام نے عمرہ ویزا سے متعلق وضاحت کرتے ہوئے مزید بتایا کہ زائرین سعودی عرب میں اپنے قیام کے دوران مکہ مکرمہ اور مدینہ منورہ کے علاوہ دیگر شہروں کا سفر بھی کر سکیں گے۔ اس کے علاوہ ایک اچھی خبر یہ بھی دی گئی ہے کہ عمرہ پر آنے والے افراد سعودی عرب میں 90 روز تک قیام کر سکتے ہیں۔
واضح رہے کہ سعودی حکام کی جانب سے بیت اللہ کے گرد لگی رکاوٹیں بھی گزشتہ دنوں ہٹا دی گئی تھیں، جس کے بعد تمام عازمین عمرہ اور نمازی بیت اللہ کو چھونے کے علاوہ حجر اسود کو بوسہ بھی دے سکتے ہیں۔

امریکا کا سعودیہ اور امارات کو مزید میزائل شکن ڈیفنس سسٹم فروخت کرنے کا فیصلہ

1234-34.jpg

واشنگٹن(ویب ڈیسک)امریکا ایک بار پھر سعودی عرب اور متحدہ عرب امارات کو میزائل شکن جدید فضائی دفاعی نظام فروخت کرے گا۔
عالمی خبر رساں ادارے کے مطابق پینٹاگون نے تصدیق کی ہے کہ امریکی محکمہ خارجہ نے متحدہ عرب امارات کو میزائل شکن ’’ٹرمینل ہائی ایلٹیٹیوڈ ایریا ڈیفنس‘‘ اور سعودی عرب کو میزائل شکن پیٹریاٹ سسٹم کے الگ الگ معاہدوں میں 5.3 بلین ڈالر کی فروخت کی منظوری دیدی۔
سعودی عرب کو 3.06 بلین ڈالر کی مالیت کے پیٹریاٹ میزائل ڈیفنس سسٹم کے لیے GEM-T کی ممکنہ فروخت کے ساتھ ساتھ سپورٹ آلات، اسپیئرز اور تکنیکی مدد جب کہ متحدہ عرب امارات کو 2.25 بلین ڈالر مالیت کے 96 میزائل شکن میزائل ڈیفنس سسٹم اور سپورٹ آلات کے ساتھ اسپیئرز اور تکنیکی مدد کی منظوری دی۔
سعودی عرب اور امارات کو جدید میزائل شکن کی فروخت کی منظوری امریکی صدر جو بائیڈن کے گزشتہ ماہ کے وسط میں مشرق وسطیٰ کے دورے کے بعد کی گئی جس کے دوران امریکی جوبائیڈن نے پٹرول کی قیمتوں کو کم کرنے کے لئے تیل کی پیداوار کے معاہدے پر بھی تبادلہ خیال کیا تھا۔
واضح رہے کہ جوبائیڈن انتظامیہ سعودی عرب کو جارحانہ ہتھیار فروخت نہ کرنے کی پالیسی کو ختم کرنے پر غور کر رہی ہے۔

Top