ملک بھر میں دو روز کے لیے موبائل سروس بند رکھنے کا فیصلہ

EyR-XtGXMAU6rXS-3.jpg

اسلام آباد(ویب ڈیسک)حکومت نے یوم عاشور کی مناسبت سے ملک بھر میں موبائل سروس بند رکھنے کا فیصلہ کرلیا۔
ذرائع کے مطابق پنجاب کے متعدد اضلاع سمیت ملک بھر کے 70 سے زائد اضلاع میں موبائل سروس بند رکھنے کی تیاریاں مکمل کرلی گئیں ہیں، فون سروس پیر کی صبح سے بند کردی جائے گی۔
وفاقی حکومت نے امن و امان کی صورتحال کو کنٹرول میں رکھنے کے لئے صوبائی حکومتوں کی معاونت سے حساس ترین اضلاع کی ایک فہرست تیار کی ہے۔
ذرائع کے مطابق سیکورٹی خدشات کے پیش نظر مذکورہ تمام اضلاع نویں محرم الحرام کو صبح نو سے رات12 بجے اور 10 محرم کو صبح 6 بجے سے رات 12 بجے تک موبائل سروس بند رہے گی۔
واضح رہے کہ 8 محرم الحرام کو کراچی سمیت ملک کے مختلف علاقوں میں صبح سے موبائل سروس غیر اعلانیہ بند تھی، جو رات گئے بحال ہوئی۔

بلوچستان ہیلی کاپٹر حادثے اور شہدا کے خلاف پروپیگنڈا کرنے والوں کے خلاف تحقیقات کا آغاز

123-62.jpg

اسلام آباد(ویب ڈیسک) وفاقی تحقیقاتی ایجنسی (ایف آئی اے) نے بلوچستان میں ہیلی کاپٹر حادثے اور شہدا کے خلاف سوشل میڈیا پر منفی پروپیگنڈا کرنے والے عناصر کے خلاف تحقیقات کا آغاز کردیا۔
پاک فوج کے ہیلی کاپٹر کے کریش ہونے و چھ شہید افسران کے خلاف منفی پروپیگنڈا کرنے والے عناصر کے خلاف تحقیقات کے لیے ایف آئی اے نے جے آئی ٹی تشکیل دے دی ہے۔
ایف آئی اے سائبر کرائم ونگ کے ایڈشنل ڈی جی کی سربراہی میں چار افسران پر مشتمل چار رکنی جے آئی ٹی کمیٹی تشکیل دی گئی ہے۔
ایف آئی اے کے مطابق ایڈیشنل ڈی جی سائبر کرائم ونگ محمد جعفر کی سربراہی میں جے آئی ٹی تحقیقات کرے گی، جس میں ڈائریکٹر آپریشن سائبرکرائم ونگ نارتھ وقار الدین سید،ایڈیشنل ڈائریکٹر ایاز، اور عمران حیدر بھی تفتیشی ٹیم کا حصہ ہوں گے۔

یزیدی حکومت سے نمٹنے کے لیے 13 اگست کو لائحہ عمل کا اعلان کروں گا، عمران خان

123-61.jpg

اسلام آباد(ویب ڈیسک) پاکستان تحریک انصاف کے چیئرمین عمران خان نے کہا ہے کہ تیرہ اگست کو یزیدی حکومت کی فسطائیت سے نمٹنے کے لیے اگلے لائحہ عمل کا اعلان کروں گا۔
سابق وزیر اعظم عمران خان نے سماجی رابطے کی سائٹ ٹویٹر پر اپنا طویل پیغام جاری کیا، جس میں انہوں نے لکھا کہ ’یہ جانتے ہوئے بھی کہ پیغمبر رسول ﷺ کے نواسے راہ حق پر تھے اُس کے باوجود کوفہ کے لوگ یزید کے خوف سے حضرت امام حسینؓ کی مدد کو باہر نہ نکلے اور پھر اسلامی تاریخ کا سب سے بڑا المیہ وقوع پزیر ہوا۔
عمران خان نے لکھا کہ ہر دور کا اپنا یزید ہوتا ہے، جو دراصل مجرموں کا برسر اقتدار گروہ ہے، آج کا یزید امریکی سازش سے حکومت میں لایا گیا، آج پاکستان یزیدیت کے نرغے میں ہے۔
انہوں نے سوال کیا کہ کیا قوم خوف میں مبتلا ہوکر اس سازش کے سامنے سر جھکائیں گے یا کڑے امتحان میں کھڑے ہو کر اس کا سامنا کریں گے۔ عمران خان نے مزید کہا کہ تیرہ اگست کو میں حقیقی آزادی جلسے میں فسطائیت سے نمٹنے کے لیے اگلے لائحہ عمل کا اعلان کروں گا۔
’سب کی غلط فہمی دور ہوجائے گی‘
چیئرمین پی ٹی آئی عمران خان سے ماہر قانون ڈاکٹر بابر اعوان کی ملاقات ہوئی جس میں انہوں نے پارٹی چیئرمین کو قانون معاملات پر بریفنگ دی اور تیرہ اگست کے جلسے پر بھی مشاورت کی۔
اس موقع پر گفتگو کرتے ہوئے پی ٹی آئی چیئرمین عمران خان نے کہا ہے کہ فوری انتخابات کو کوئی نہیں روک سکتا، 13 اگست کا جلسہ سب کی غلط فہمیوں کو دور کردے گا۔
انہوں نے کہا کہ تیرہ اگست کا جلسہ انقلاب کا آغاز ہوگا، ملک میں فوری انتخابات کو کوئی نہیں روک سکتا، جنہیں غلط فہمی ہے وہ جلد دور ہوجائے گی کیونکہ عوام اب عام انتخابات کے مطالبے سے پیچھے نہیں ہٹیں گے۔
بابر اعوان نے کہا کہ سیاسی میدان میں شکست کھانے والا ٹولہ انتخابات سے بھاگ رہا ہے، شوباز کی نالائق الیون جو مرضی کر لے مقابلہ کریں گے، جعلی مقدمات اور جھوٹی تحقیقات عوامی بیانیہ نہیں بن سکیں گی، اب آئی آئی پی ٹی آئی نہیں دو تہائی پی ٹی آئی ہو گا۔
واضح رہے کہ پاکستان تحریک انصاف نے یوم آزادی کی مناسبت سے اسلام آباد میں تاریخی جلسے کے انعقاد کا اعلان کیا ہے۔

شہدا کا تمسخر اڑانے والوں کا احتساب ضروری ہے، وزیر اعظم

123-60.jpg

اسلام آباد(ویب ڈیسک) وزیراعظم شہباز شریف نے کہا ہے کہ شہدا کا تمسخر اڑانے والوں کا شدت سے احتساب ضروری ہے، ہیلی کاپٹر حادثے کے بعد شہدا اور انہیں برا بھلا کہنے کی سوشل میڈیا پر خوفناک مہم چلائی گئی۔
وزیراعظم شہباز شریف نے سماجی رابطے کی سائٹ پر جاری اپنے ایک بیان میں کہا کہ شہدا کی قربانیوں کا تمسخر اڑانے والے کا عمل قابل افسوس اور قابل مذمت ہے، ایسے لوگوں کا احتساب بہت ضروری ہے۔
انہوں نے کہا کہ ہمارے شہداء کی قربانیوں کا تمسخر اڑانےاور انہیں برا بھلا کہنےکی سوشل میڈیامہم صرف شرمناک ہی نہیں خوفناک بھی ہے۔ متکبر اور منافقانہ سیاسی نظریےکا یہی نتیجہ ہےکہ یہ کم سن ذہنوں میں زہرگھول کربد تہذیبی کوترویج دیتا ہے‘۔
وزیراعظم نے سوال کیا کہ ’آخرہمارا معاشرہ کس سمت جا رہاہے؟ ہمیں شدت سےخوداحتسابی کی ضرورت ہے‘۔
واضح رہے کہ ایک روز قبل وزیر دفاع خواجہ آصف نے کہا تھا کہ ہیلی کاپٹر حادثے پر سوشل میڈیا پر مہم چلانے والوں کی مالی سرپرستی کی جاتی ہے۔

پی ٹی آئی ممنوعہ فنڈنگ کے معاملے پر حکومت پاگل ہوگئی ہے، فواد چوہدری

123-59.jpg

اسلام آباد(ویب ڈیسک)تحریک انصاف کے رہنما فواد چوہدری کا کہنا ہے کہ حکومت پی ٹی آئی کے فنڈنگ کے معاملے کو لے کر پاگل ہی ہوگئی ہے۔
اسلام آباد میں پریس کانفرنس کرتے ہوئے فواد چوہدری نے کہا کہ ٹوٹل 13 اکاؤنٹس ہیں جس میں ہمارے لوگوں کو کل 2 کروڑ روپے ٹرانسفر ہوئے لیکن بڑھا چڑھا کر اس رقم کو اربوں روپے بتایا جا رہا ہے، الیکشن کمیشن کو یہ اکاؤنٹس کی تفصیلات دی گئیں۔
فواد چوہدری نے کہا کہ بتا چکا ہوں ایک انٹرنیشنل اکاؤنٹ کھلا اور اس میں ساری فنڈنگ آئیں، یہ 13اکاؤنٹس بھی ڈیکلیئرڈ ہیں اور ایک ایک کی تفصیل ہم نے فراہم کر دی ہے۔ سپریم کورٹ نے الیکشن کمیشن کو ساری جماعتوں کے اکاؤنٹس پر اکٹھا فیصلہ کرنے کا حکم دیا، فنڈنگ آڈٹ قانوناً ہر سال ہونا ہے، کیسے پیسے اکٹھے کیے اور خرچ کیے۔
انہوں نے انکشاف کیا کہ 2013 کے الیکشن میں ہمارے رہنماوں کو 20 سے 25 لاکھ روپے بھیجے گئے۔
فواد چوہدری نے سوال اٹھایا کہ تحریک انصاف کے 4 ملازمین کو ایف آئی اے نے بلایا ہے، ایف آئی اے کس حیثیت سے یہ نوٹسز جاری کر رہی ہے، توقع ہے ہم ایف آئی اے میں پیش ہوں گے اور وہ بھی پیش ہوں گے، عدالت نے کہا کہ ایف آئی اے سے تعاون کرنا ہے تو کریں گے۔
انہوں نے کہا کہ رانا صاحب صرف کوہسار تھانے کے ایس ایچ او ہیں بس، رانا صاحب فیصل آباد نہیں گئے کیونکہ انہوں نے احتیاط کی۔
فواد چوہدری نے کہا کہ ہم نے فیصلہ کیا ہے کہ ایک مشترکہ تحقیقاتی ٹیم بنائی جائے اور 25مئی کے مقدمات کے حوالے سے ان سے تحقیقات کی جائے، ہمیں امید ہے کہ رانا ثنااللہ اور باقی لوگ چھپیں گے نہیں۔
پی ٹی آئی رہنما نے الزام لگایا کہ الیکشن کمیشن نہ صرف جانبدار ہے بلکہ یہ ملا ہوا ہے، الیکشن کمیشن اس وقت پی ڈی ایم کی سبسڈری بن گیا ہے۔
قبل ازیں اپنے ٹویٹ میں فواد چوہدری نے وزیر داخلہ رانا ثناء کے لیے سخت الفاظ استعمال کیے اور کہا کہ رانا صاحب! اپنی اوقات کے مطابق بات کیا کریں، آپ تھانہ کوہسار کے ایس ایچ او ہیں، اس سے زیادہ آپ کی کوئی حیثیت نہیں، یہ نہ ہو کہ لینے کے دینے پڑ جائیں۔
فواد چوہدری نے مزید کہا کہ بہادر آپ اتنے ہیں کہ جب سے حکومت تبدیل ہوئی ہے آپ فیصل آباد نہیں گئے بہرحال احتیاط اچھی چیز ہے۔

اسلامی ٹچ دینے والے فنکاروں کو اب ’’قانونی ٹچ‘‘ کی ضرورت ہے، وزیر داخلہ

123-58.jpg

اسلام آباد(ویب ڈیسک) وزیر داخلہ رانا ثناء اللہ کا کہنا ہے کہ ’’اسلامی ٹچ‘‘ دینے والے فنکاروں کو اب ’’قانونی ٹچ‘‘ کی ضرورت ہے کیونکہ فارن فنڈنگ کے مجرم 8 سال سے ’’قانونی ٹچ‘‘ سے بھاگ رہے ہیں۔
شیخ رشید کے بیان پر ردعمل دیتے ہوئے رانا ثناء اللہ نے کہا کہ عالمی بنارسی ٹھگ غیر ملکیوں سے غیرقانونی ڈالر لیتے پکڑے گئے ہیں، ہر چوری پکڑے جانے پر ’’جھوٹا عمران اینڈ فارن ایجنٹس کمپنی‘‘ مکاری، فنکاری اور عیاری کرنے لگتے ہیں۔
انہوں نے کہا کہ فارن فنڈنگ کیس سے پتہ چلا کہ عمران نیازی کتنا گندا کردار ہے، شہدا کے خلاف نفرت انگیز مہم چلانے والے گندے اور گھٹیا کردار ہیں۔
وزیر داخلہ کا کہنا تھا کہ عمران نیازی نے 8 سال پوری کوشش کی کہ فارن فنڈنگ کیس کا فیصلہ نہ آئے لیکن اللہ تعالیٰ نے اکبر ایس بار کو سچا ثابت کر دیا، اللہ تعالیٰ کا پاکستان پر کرم ہوا اور جعلی صادق اور امین کی اصلیت قوم کے سامنے آگئی۔

پی این ایس تیمورکا چین سے واپسی پر ملائیشیا کی بندرگاہ کا دورہ

g7-3.jpg

اسلام آباد(بادشمال نیوز) پاکستان بحریہ میں نئے کمشن ہونے والے جہاز پی این ایس تیمور نے چین سے پاکستان واپسی کے دوران ملائیشیا کی بندرگاہ لاموٹ کا دورہ کیا۔بندرگاہ آمد پر کوالالمپور میں پاکستان کے دفاعی اتاشی کموڈور ناصر محمود اور رائل ملائیشین نیوی کے اعلی حکام نے جہاز کا استقبال کیا۔ اس موقع پر ملائیشیا کے ملٹری بینڈ نے استقبالیہ دھنیں بجائی۔پی این ایس تیمور کا دورہ ہاربر اور سمندری دو مراحل پر مشتمل تھا۔ ہاربر مرحلے میں عسکری قیادت کی پیشہ وارانہ امور اور دوطرفہ معاملات پر بات چیت ہوئی۔جبکہ سمندری مرحلے میں دونوں بحری افواج کے مابین مشترکہ آپریشن کی صلاحیتوں کو بڑھانے کیلئے بحری مشق MALPAK-IV کا انعقاد کیا گیا۔بندرگاہ کے دورے کے دوران پی این ایس تیمور کے کمانڈنگ آفیسر کیپٹن یاسر طاہر نے رائل ملائیشین نیوی کے ڈپٹی ویسٹرن فلیٹ کمانڈر اور کمانڈنگ آفیسر آف کے ڈی سلطان ادریس اول سے ملاقات کی۔ ملاقات کے دوران باہمی دلچسپی کے امور اور دو طرفہ تعاون پر تبادلہ خیال کیا گیا۔ اس موقع پر جہاز کے کمانڈنگ آفیسر نے چیف آف دی نیول اسٹاف ایڈمرل محمد امجد خان نیازی کی جانب سے ملائیشیا کے عوام اور بلخصوص ملائیشین بحریہ کیلئے نیک خواہشات کا اظہار کیا۔ رائل ملائیشین نیوی کے افسران اور کوالالمپور میں موجود مختلف سفارتی حکام نے پی این ایس تیمور کا دورہ کیا۔معزز مہمانوں کو بحر ہند میں پاک بحریہ کے ریجنل میری ٹائم سیکیورٹی پٹرول کے بارے میں بریفنگ دی گئی۔ پاک بحریہ کے افسران نے ملائیشین نیوی کی مختلف ٹریننگ تنصیبات اور جہاز KD JEBAT کا دورہ بھی کیا۔پاک بحریہ کے جہاز کے ملائیشیا کے دورے اور بحری مشق میں شرکت سے دونوں دوست ممالک کے موجودہ قریبی سفارتی تعلقات کو مزید فروغ ملے گا۔

فارن فنڈنگ کیس منطقی انجام تک پہنچانے کا فیصلہ کرلیا: حمزہ کی نواز شریف سے ملاقات کے بعد گفتگو

01.webp

لندن میں مسلم لیگ ن کے قائد میاں محمد نواز شریف سے ملاقات کے بعد گفتگو کرتے ہوئے حمزہ شہباز نے کہا کہ حکومت اور تمام اتحاد ی جماعتوں نے ممنوعہ فارن فنڈنگ کیس کو منطقی انجام تک پہنچانے کا فیصلہ کرلیا ہے۔رہنما مسلم لیگ ن حمزہ شہباز کی لندن میں نواز شریف سے ملاقات ہوئی جس کے بعد میڈیا سے گفتگو میں انہوں نے کہا کہ انا کے پہاڑ پر بیٹھ کر سب کو چور اور ڈاکو کہنے والے ڈیکلیئرڈ صادق اور امین کا قوم محاسبہ کرے گی۔حمزہ شہباز نے کہا کہ اگر نواز شریف بیٹے سے تنخواہ نہ لینے کے الزام میں نااہل ہوسکتے ہیں تو عمران نیازی تو سر سے لے کر پیر تک ممنوعہ فنڈنگ کیس میں ڈوبے ہوئے ہیں۔
حمزہ نے کہا کہ آنے والا الیکشن اپنے وقت پر 2023 میں ہوگا اور مجھے پوری امید ہے اس میں مسلم لیگ ن کی الیکشن مہم کی قیادت نواز شریف خود کریں گے۔
وزیراعلیٰ پنجاب کے انتخاب سے متعلق سوال کے جواب میں انہوں نے کہا کہ اس معاملے کو ایسے نہیں چھوڑیں گے، عدالت سے انصاف لیں گے، جب اس معاملے پر فل کورٹ بنے گا تو سب دودھ کا دودھ پانی کا پانی ہوجائے گا۔

حافظ آباد میں مسافر بردار بس کھائی میں گرنے سے 8 افراد جاں بحق

123-44.jpg

لاہور(ویب ڈیسک)پنڈی بھٹیاں میں حافظ آباد روڈ پر مسافر بردار بس کھائی میں گھرنے سے 8 افراد جاں بحق ہوگئی۔
فراہم کردہ معلومات کے مطابق حادثے میں زخمیوں کی تعداد 30 سے تجاوز کرگئی جبکہ بس گوجرانولہ سے سرگودھا جا رہی تھی۔ وزیر اعلیٰ پنجاب نے حافظ آباد ٹریفک حادثہ میں قیمتی جانوں کے ضیاع پر اظہار افسوس کیا۔
عینی شاہدین کے مطابق بس تیز رفتاری کے باعث کھائی میں گری جس میں برساتی پانی تھا۔ ریسکیوکے مطابق بس کو کھائی سے نکالنے کیلئے کوششیں جاری ہیں۔

پی ٹی آئی کا جشن آزادی پر اسلام آباد میں بڑے جلسے کا فیصلہ

123-43.jpg

تحریک انصاف نے 13 اور 14 اگست کی درمیانی شب اسلام آباد میں بڑے جلسے کے انعقاد کا فیصلہ کیا ہے۔
عمران خان کی زیر صدارت پی ٹی آئی سیاسی کمیٹی کا اجلاس منعقد ہوا۔ اجلاس میں شاہ محمود قریشی، فواد چوہدری، شیریں مزاری، عثمان ڈار، عمر ایوب اور دیگر نے شرکت کی۔ کئی پی ٹی آئی رہنما ویڈیو لنک کے ذریعے اجلاس میں شریک ہوئے۔
اجلاس میں موجودہ سیاسی صورتحال پر غور کیا گیا۔ اجلاس میں 9 حلقوں میں ضمنی انتخابات سے متعلق قانونی امور کا بھی جائزہ لیا گیا ساتھ ہی مختلف کیسز میں عدالتوں میں دائر درخواستوں پر پیش رفت پر بریفنگ دی گئی۔ اجلاس میں آئندہ کی سیاسی حکمت عملی کے لیے مختلف تجاویز پر غور کیا گیا۔
اجلاس میں اسلام آباد میں جلسے کے اعلان سے متعلق مشاورت کی گئی۔ ذرائع کے مطابق طے پایا کہ 13 اگست کی شام کو کارکنان پریڈ گراؤنڈ میں جمع ہوں گے، 14 اگست کے آغاز پر رات کو جلسہ گاہ میں جشن آزادی منایا جائے گا۔

Top