اے سی سی اجلاس، پاکستان میں ایشیا کپ کے انعقاد کا فیصلہ نہ ہوسکا

123-132.jpg

منامہ: پاکستان نے ایشین کرکٹ کونسل کے اجلاس میں ایشیاء کپ کی میزبانی سے دستبردار ہونے سے انکار کردیا۔ اس بارے میں مزید پیش رفت اگلے ماہ اجلاس میں ہوگی۔

بحرین میں ہوئے اجلاس میں پی سی کے چیئرمین نجم سیٹھی نے میزبانی کا ڈٹ کر کیس لڑاجبکہ بھارتی کرکٹ بورڈ نے ایک بار پھر اپنی ٹیم پاکستان نہ بھیجنے کا موقف پیش کیا۔
بھارتی بورڈ کے سیکریٹری جے شاہ کے مطابق حکومتی اجازت کے بغیر بھارتی ٹیم پاکستان نہیں بھیج سکتے۔ پی سی بی اور بی سی سی آئی کے اپنے اپنے موقف سے نہ ہٹنے کے بعد اب مارچ میں اے سی سی کے اجلاس اہمیت اختیار کرگیا ہے جس میں ایشیاء کپ کے حوالے سے فیصلے ہوگا۔
اگر پاکستان میں یہ ایونٹ ممکن نہ ہو پایا تو سری لنکا اور یو اے ای ممکنہ متبادل آپشن ہوسکتے ہیں۔
چیئرمین پی سی بی نجم سیٹھی اجلاس کے بعد بحرین سے دوبئی پہنچ گئے ہیں جہاں ایک روز قیام کےبعد وطن واپس لوٹیں گے۔
ایشین کرکٹ کونسل کے اجلاس میں جاپان اور انڈونیشیا کو پاتھ وے پروگرام میں شامل کرنے کے ساتھ سالانہ کیلنڈر آف ایونٹس اور بجٹ کی بھی منظوری دی گئی ۔

قومی فاسٹ بولر نسیم شاہ ڈی ایس پی بن گئے

123-131.jpg

کوئٹہ: قومی فاسٹ بولر نسیم شاہ بلوچستان پولیس میں ڈی ایس پی بن گئے۔

کرکٹر نسیم شاہ کو بلوچستان پولیس کا خیرسگالی سفیر مقرر کرکے ڈی ایس پی کے رینک سے نوازا گیا ہے، انکا عہدہ اعزازی ہوگا۔
آئی جی پولیس بلوچستان عبدالخالق شیخ کا تقریب سے خطاب کرتے ہوئے کہنا تھا کہ نسیم شاہ نوجوانوں کے لیے رول ماڈل ہے، نسیم شاہ نے محدود وسائل کے باوجود اپنا مقام بنایا۔
عبدالخالق شیخ نے کہا کہ نسیم شاہ کو اعزازی ڈی ایس پی مقرر کرنا بلوچستان پولیس کیلئے اعزاز ہے، قومی ہیرو کی خدمات کو سراہتے ہوئے اعزاز دے رہے ہیں۔
قومی فاسٹ بولر نسیم شاہ نے تقریب سے خطاب کرتے ہوئے کہا کہ پولیس اہلکار ڈیوٹی دیتے ہوئے نیند کی پرواہ نہیں کرتے، بچپن میں پولیس سے ڈرتا تھا۔
نسیم شاہ کو ڈی ایس پی کا رینک لگانے کی تقریب میں اعلیٰ پولیس افسران اور کھیلوں سے وابستہ شخصیات نے شرکت کی۔

شاہین آفریدی نکاح کی تصاویر وائرل ہونے پر خفا

123-130.jpg

کراچی: پاکستان کرکٹ ٹیم کے فاسٹ بولر شاہین شاہ آفریدی نے اپنی شادی کی تصاویر سوشل میڈیا پر وائرل نہ کرنے کی درخواست کی ہے۔

انہوں نے سماجی روابط کی ویب سائٹ ٹوئٹر پر کہا کہ یہ بہت مایوس کن صورتحال ہے کہ بار بار اور متعدد مرتبہ درخواست کی گئی کہ ہماری پرائیویسی کو ٹھیس نہ پہنچائیں لیکن لوگ بغیر کسی پشیمانی کے (شادی کی تصاویر) شیئر کررہے ہیں۔
شاہین شاہ آفریدی نے مزید کہا کہ ’میں سب سے ایک بار پھر عاجزی کے ساتھ درخواست کرنا چاہوں گا کہ وہ ہمارے ساتھ تعاون پیدا کریں اور ہمارے انتہائی یاد گار دن کو خراب کرنے کی کوشش نہ کریں۔

قومی کرکٹر شاہین شاہ اور انشاء آفریدی نکاح کے بندھن میں بندھ گئے

123-95.jpg

کراچی: پاکستان کرکٹ ٹیم کے فاسٹ بولر شاہین شاہ آفریدی سابق کپتان شاہد آفریدی کی چھوٹی صاحبزادی انشاء آفریدی کیساتھ نکاح کے بندھن میں بندھ گئے۔

شاہین شاہ آفریدی اور انشاء آفریدی کا نکاح ڈی ایچ اے کی مقامی مسجد میں انجام پایا جس میں قریبی رشتے دار شریک ہوئے۔ پاکستانی پیسر اپنے بڑے بھائی ریاض آفریدی کے ہمراہ نکاح کے لیے پہنچے۔
نکاح کی تقریب کے بعد دلہا کی جانب سے مہمانوں کے لیے نجی ہوٹل میں عصرانے کا انتظام کیا گیا، جس میں قومی کپتان بابر اعظم، سابق ٹیسٹ کپتان معین خان، محمد حفیظ، سرفراز احمد، نسیم شاہ آل راونڈر شاداب خان، سابق عالمی اسکواش چیمپئین جہانگیر خان و دیگر نے بھی شرکت کی۔
دوسری جانب نکاح کی خوشی میں شاہد آفریدی کی جانب سے جمعہ کی شب مقامی کلب میں عشائیہ دیا جائے گا جس میں انکے عزیز و اقارب کے علاوہ قومی کرکٹرز اور دیگر شخصیات بھی شریک ہوں گی۔
انشاء آفریدی کی رخصتی انکی تعلیم مکمل ہونے کے بعد عمل میں آئے گی، واضح رہے کہ شاہد خان آفریدی کی بڑی صاحبزادی اقصا کی شادی گزشتہ ماہ نصیر ناصر خان سے انجام پائی تھی۔

پی ایس ایل 8 کے ٹکٹوں کی آن لائن فروخت کل سے شروع ہوگی

123-94.jpg

لاہور: پاکستان سپر لیگ سیزن 8 کے ٹکٹوں کی آن لائن فروخت کل (ہفتہ سے ) سے شروع ہوگی۔

پی ایس ایل کے ٹکٹ pcb.bookme.pk پر خریدے جاسکتے ہیں، ہر میچ کے لئے ٹکٹوں کی قیمت مختلف ہوگی، ابتدائی طور پر ٹکٹوں کی آن لائن فروخت ہوگی جبکہ میچز کے دوران ٹکٹوں کی فروخت کیلئے اسٹیڈیمز کے قریب بوتھ بھی بنائے جائیں گے۔
لاہور میں جنرل اسٹینڈ کے ٹکٹس کی قیمت 650 سے 1200 روپے تک ہوگی۔ کراچی اور ملتان میں جنرل اسٹینڈز کے ٹکٹ 650 سے 1000 روپے میں ملیں گے۔
لاہور کے ہاسپٹیلٹی باکس کا ٹکٹ 10،000 سے 18،000 روپے جبکہ کراچی کے ہاسپٹیلٹی باکس کے ٹکٹ کی قیمت 10،000 سے 15،000 روپے مقرر کی گئی ہے، ملتان کے ہاسپٹیلٹی باکس کی قمیت 12 سے 18 ہزار روپے ہوگی۔
راولپنڈی میں پریمیٔم ٹکٹس 1000 سے 2500 روپے جبکہ پلاٹینم بکس کی قیمت 12000 سے 18000 روپے تک ہوگی۔
اس بار چاروں شہروں میں میچز کیلئے سیزن ٹکٹس بھی متعارف کروائے گئے ہیں جن کی مختلف قمیتیں مقرر کی گئی ہیں۔

محمد حفیظ نے کراچی یونیورسٹی میں داخلہ لے لیا

123-93.jpg

کراچی: قومی کرکٹ ٹیم کے سابق کپتان محمد حفیظ کا جامعہ کراچی میں داخلہ ہوگیا۔

محمد حفیظ نے جمعہ کے روزصدر شعبہ ہیلتھ فزیکل ایجوکیشن اینڈ اسپورٹس سائنسز جامعہ کراچی پروفیسرڈاکٹر باسط انصاری کے ہمراہ وائس چانسلرجامعہ کراچی پروفیسر ڈاکٹر خالد محمودعراقی سے ملاقات کی اور انہیں بتایا کہ وہ بھی اس سال سے جامعہ کراچی کے طالبعلم ہیں کیونکہ ان کا شعبہ ہیلتھ فزیکل ایجوکیشن اینڈاسپورٹس سائنسز میں داخلہ ہواہے۔
محمد حفیظ نے بتایا کہ کھیل کی وجہ سے وہ اپنا تعلیمی سفرمکمل نہیں کرسکے تھے تاہم اب انہیں ایک بہترین موقع میسرآیاہے جس سے وہ بھرپوراستفادہ کریں گے۔ جامعہ کراچی کے وائس چانسلر پروفیسر ڈاکٹر خالد محمود عراقی نے محمد حفیظ کو جامعہ کراچی میں خوش آمدید کہتے ہوئے کہا کہ ہماری نوجوان نسل کوکھیل کود میں بھی حصہ لینا چاہیے جو ذہنی وجسمانی نشوونما کے لئے ناگزیر ہے۔

شاہین شاہ آفریدی کا نکاح؛ ملکی اور غیرملکی کھلاڑیوں کے مبارکباد کے پیغامات

123-92.jpg

لاہور: پاکستان کرکٹ ٹیم کے فاسٹ بولر اور قلندرز کے کپتان شاہین شاہ آفریدی کے نکاح پر ملکی اور غیرملکی کھلاڑیوں کی جانب سے تہنیتی پیغامات کا سلسلہ شروع ہوگیا۔

افغان اسپنر راشد خان نے کہا کہ شاہین آفریدی آپ کو نکاح کی بہت بہت مبارک ہو جبکہ جنوبی افریقی آلرآؤنڈر ڈیوڈ ویسا نے شاہین شاہ کو سکھی زندگی گزارنے کا مشورہ دیا۔ انہوں نے کہا کہ ’شاہین یاد رکھنا! بیگم سکھی تو زندگی سکھی‘۔
حارث رؤف نے معذرت کرتے ہوئے کہا کہ ’نکاح میں شرکت نہیں کرسکا، پی ایس ایل میں جشن منائیں گے۔ فخر زمان نے کہا کہ شاہین ایسے ہی پاکستان کا نام روشن کرتے رہو۔
آسٹریلوی بلے باز بین ڈنک نے شاہین شاہ کے مستقبل کے لیے نیک خواہشات کا اظہار کیا۔ انگلینڈ کے کھلاڑی جوئے ڈینلی نے اپنے پیغام میں کہا کہ ’شادی کی بہت بہت مبارکباد‘۔
انگلینڈ کے کھلاڑی ٹام ایبل نے شاہین شاہ کو شادی کی مبارکباد دیتے ہوئے کہا کہ ’شادی مبارک شاہین، آپ کی اہلیہ بہت خوش قسمت ہیں‘۔ زمبابوے کے اسٹار کھلاڑی سکندر رضا نے کہا کہ شاہین اور ان کی اہلیہ کے لیے نیک تمنائیں۔ کامران غلام نے کہا کہ ’اللہ شاہین کو کامیاب کرے‘۔

شعیب ملک آج کیریئر کا 500 واں ٹی20 میچ کھیلیں گے

123-91.jpg

لاہور: قومی کرکٹ ٹیم کے سابق کپتان شعیب ملک جمعے کو کیریئر کا 500 واں ٹی20 میچ کھیلیں گے۔

بنگلہ دیش پریمئیر لیگ (بی پی ایل) میں رنگپور رائیڈرز کی نمائندگی کرنے والے آل راؤنڈر اچھی فارم میں نظر آرہے ہیں، انھوں نے کیریئر کو مزید طول دینے کا عزم بھی ظاہر کیا۔ سوشل میڈیا پر اپنے پیغام میں شعیب ملک نے 41 ویں سالگرہ پر مبارکباد دینے والوں کا شکریہ ادا کرتے ہوئے بتایا کہ جمعے کو کیریئر کا 500 واں ٹی20 میچ کھیلوں گا۔
شعیب ملک کا کہنا تھا کہ ٹیم کا سب سے سینئیر کھلاڑی ہوں لیکن اسکے باوجود ’’فٹنس کسی 25 سالہ نوجوان سے کم نہیں‘‘ کیریئر کی اننگز جاری رکھنے کیلیے پُرعزم ہوں، ٹیسٹ اور ون ڈے کرکٹ کرکٹ سے تو پہلے ہی ریٹائر ہوگیا تھا مگر ٹی ٹوئنٹی میں اپنی بہترین کارکردگی دکھانے کی کوشش کرتا ہوں۔

رمیز راجا پی ایس ایل سمیت جہاں چاہیں کمنٹری کیلئے آزاد ہیں، ترجمان پی س بی

123-90.jpg

لاہور: پاکستان کرکٹ بورڈ (پی سی بی) نے کمنٹری کے لیے معافی مانگنے کا رمیز راجا کا دعویٰ مسترد کردیا۔

ترجمان پی سی بی کے مطابق سابق چیئرمین کمنٹری کیلئے آزاد ہیں، ان پر کسی قسم کی کوئی پابندی نہیں ہے، وہ چاہیں جہاں چاہیں بطور کمنٹیٹر کام کرسکتے ہیں۔
ان کا کہنا تھا کہ بورڈ نے ان سے پہلے معافی مانگنے اور پھر کمنٹری کے لیے درخواست دینے کا کوئی مطالبہ نہیں کیا، کرکٹ بورڈ کی مینجمنٹ کمیٹی کے سربراہ نجم سیٹھی پہلے بھی اپنے بیانات میں یہ واضح کرچکے ہیں کہ رمیز راجا پاکستان سپر لیا (پی ایس ایل) سمیت ہر جگہ کمنٹری کرسکتے ہیں۔
قبل ازیں سابق چیئرمین پی سی بی نے اپنے بیان میں موقف اختیار کیا تھا کہ پی ایس ایل میں بطور کمنٹیٹر کام کرنے کے لیے بورڈ چاہتا ہے کہ پہلے ان سے معافی مانگوں اور پھر کمنٹری کے لیے درخواست دوں۔
واضح رہے کہ پاکستان سپر لیگ کے لیے کمنٹری پینل کا اعلان اگلے ہفتے متوقع ہے۔

پی ایس ایل8؛ نمائشی میچ کی تیاریاں مکمل، سیکیورٹی کے سخت انتظامات

123-89.jpg

پاکستان سپر لیگ (پی ایس ایل) کے آٹھویں سیزن کے آغاز سے قبل کوئٹہ گلیڈی ایٹرز اور پشاور زلمی کے درمیان کھیلے جانے والے نمائشی میچ کیلئے انتظامات کاسلسلہ جاری ہے جبکہ بنگلہ دیش پریمیئر لیگ (بی پی ایل) سے کھلاڑیوں کی واپسی کا عمل بھی تقریبا مکمل ہوگیا۔

تفصیلات کے مطابق 13 فروری سے شروع ہونے والے پی ایس ایل 8 سے قبل کوئٹہ میں لیگ کی دو معروف ٹیموں گلیڈی ایٹر اور پشاور زلمی کے درمیان بگٹی اسٹیڈیم میں اتوار کو نمائشی میچ کھیلا جائے گا۔
قومی کرکٹ ٹیم کے مڈل آرڈر بلےباز عمر اکمل، عثمان قادر، محمد حارث اور اسامہ میر سمیت دیگر کھلاڑی کوئٹہ پہنچ گئے ہیں جبکہ دیگر کھلاڑی جمعہ کی شب شاہین شاہ آفریدی کی شاہد آفریدی کی صاحبزادی سے نکاح کی تقریب میں شرکت کے بعد کوئٹہ پہنچیں گے جس میں کپتان بابراعظم بھی شامل ہیں۔
پاکستان کے بڑا نام شاہد آفریدی بھی ایکشن میں دیکھائی دینگے، اس کے علاوہ پی سی بی کےچیف سلیکٹر ہارون رشید بھی کوئٹہ پہنچ گئے ہیں جبکہ امپائرز پینل میں شامل علیم ڈار اور آصف یعقوب کے ساتھ کمنٹری پینل کے ارکان نے بھی کوئٹہ کا رخ کرلیا ہے۔
دوسری جانب صوبائی حکومت کی جانب سے انتظامات کاسلسلہ زوروشور کے ساتھ جاری ہے،اس سلسلے میں سیکورٹی کے سخت ترین حفاظتی انتظامات کیے گئے ہیں۔
واضح رہے کہ نمائشی میچ کے ٹکٹ ہاتھوں ہاتھ فروقخت ہوچکے ہیں جن کی قمیت محض 20 روپے مقرر کی گئی تھی۔

Top