لندن: ایک نئی تحقیق میں معلوم ہوا ہے کہ مہینے میں ایک بار بھی جاگنگ کا کیا جانا بڑھاپے میں یاد داشت کی مضبوطی کے لیے کافی ہوتا ہے۔
یونیورسٹی کالج لندن کے سائنس دانوں نے ایک تحقیق میں 1400 افراد کی ورزش کی عادات کا 30 سال کے عرصے تک مطالعہ کیا۔
تحقیق میں جب ہر شخص 69 برس کی عمر کو پہنچا تو ان کی یاد داشت، توجہ، زبان اور زبانی روانی کی آزمائش کے لیے ٹیسٹ لیا گیا۔
وہ افراد جو معتدل سطح پر فعال تھے یعنی ہر مہینے ایک سے چار بار جسمانی سرگرمیوں کا حصہ بنتے تھے، ان کی یاد داشت کی صورت حال کم ورزش کرنے والوں کی نسبت زیادہ بہتر تھی۔
بیڈمنٹن کھیلنا، تیراکی کرنا، فٹنس کے لیے ورزش کرنا، ڈانس کرنا، یوگا کرنا، فٹبال کھیلنا، جاگنگ کرنا یا تیز چلنے جیسی سرگرمیوں کے کم از کم 30 منٹ تک کے دورانیے کو ورزش کے ایک دور کے طور پر شمار کیا گیا۔
تحقیق کے دوران شرکاء نے 36، 43، 53، 60 سے 64 اور 69 برس کی عمروں میں پانچ موقعوں پر ایک سوالنامہ پُر کیا۔
مجموعی طور پر 11 فی صد شرکاء پانچوں مواقع پر جسمانی طور پر فعال نہیں تھے جبکہ 15 فی صد افراد ہر موقعے پر کچھ ورزش کیا کرتے تھے۔گروپ میں اکثریتی افراد کا کہنا تھا کہ وہ مہینے میں کم از کم دو بار ورزش کرتے تھے۔
گزشتہ مطالعوں میں یہ بتایا جا چکا ہے کہ مستقل ورزش کرنے سے ڈیمینشیا کے خطرات میں ایک تہائی کمی آتی ہے۔
