اسلام آباد: پی ٹی آئی کے رہنما اسد عمر نے پنجاب حکومت پر ضمنی انتخابات سے قبل دھاندلی کا الزام عائد کرتے ہوئے الیکشن کمیشن پر تنقید کی ہے کہ وہ خود کو بھی ایک انتخابی نشان الاٹ کردے۔
سابق وفاقی وزیر نے پریس کانفرنس میں قبل از الیکشن دھاندلی کا الزام عائد کرتے ہوئے کہا کہ صوبے میں ضمنی انتخابات کی تیاری زوروں پر ہے اور واضح طور پر پی ٹی آئی کی برتری نظر آرہی ہے۔ انہوں نے کہا کہ ضمنی الیکشن میں پنجاب حکومت کی طرف سے دھاندلی کی کوشش کی جارہی ہے۔
اسد عمر نے کہا کہ الیکشن میں سرکاری مشینری استعمال ہورہی ہے، ہمارے لوگوں کو دھمکیاں مل رہی ہیں۔ ووٹ کے غیر قانونی طور پر اندراج جاری ہیں اور ہمارے نوٹس کے باوجود الیکشن کمیشن خاموش ہے۔الیکشن شیڈول جاری ہونے کے بعد ووٹوں کو آگے پیچھے نہیں کیا جاسکتا ۔ ضمنی انتخابات میں سب سے بڑا مسئلہ غیر قانونی ووٹوں کے اندراج کا ہے۔ بڑی تعداد میں غیر قانونی ووٹ درج کروائے گئے۔
اسد عمر نے مزید کہا کہ عمران ریاض اس وقت مشکل میں ہے لیکن ہیرو بن کر واپس لوٹے گا۔ اس واقعے پر پاکستانی عوام کا اداروں سے یقین اٹھتا جارہا ہے۔
دوسری جانب الیکشن کمیشن نے پی ٹی آئی سیکرٹری جنرل اسد عمر کی پریس کانفرنس پر ردعمل دیتے ہوئے وضاحت جاری کی ہے کہ پنجاب کے 20 حلقوں میں 17جولائی کو ہونے والے انتخابات پرانی حتمی انتخابی فہرستوں پر ہوں گے۔ شیڈول کے اعلان کے بعد انتخابی فہرست منجمد کر دی جاتی ہے۔
ترجمان الیکشن کمیشن کے مطابق ووٹر لسٹ میں تب تک کوئی تبدیلی نہیں کی جا سکتی جب تک متعلقہ حلقے میں الیکشن کا انعقاد نہ ہو جائے۔ اس حوالے سے میڈیا پر چلنے والے ووٹ اندراج کے بیانات بے بنیاد اور حقیقت کے بر عکس ہیں۔
الیکشن کمیشن نے اپنی وضاحت میں کہا کہ یہ سراسر پروپیگنڈا ٹیکنیک ہے جس کے ذریعے عوام کو گمراہ کیا جا رہا ہے۔ الیکشن کمیشن 20 حلقوں میں شفاف الیکشن کے انعقاد کے لیے پر عزم ہے۔
