نئی کورونا لہر بہت خطرناک ہے، سخت پابندیاں لگاسکتے ہیں، اسد عمر

694838_9490774_Asad-Umar_updates.jpg

لوگ بہت زیادہ احتیاط کریں،، نئی لہر پہلے سے زیادہ مہلک اور بہت تیزی سے پھیل رہی ہے، اسپتالوں میں روزانہ مریضوں کے داخلے ہورہے ہیں،سربراہ نیشنل کمانڈ اینڈ آپریشن سینٹر کا بیان
اسلام آباد(آئی این پی ) وفاقی وزیر منصوبہ بندی اسد عمر نے خبردار کیا ہے کہ نئی کورونا لہر بہت خطرناک ہے اور مثبت کیسز میں تیزی سے اضافہ ہورہا ہے جس کے باعث حکومت عوامی سرگرمیوں پر سخت پابندیاں لگاسکتی ہے۔ جمعرات کو سماجی رابطے کی ویب سائٹ ٹوئٹر پر اپنے بیان میں اسد عمر نے کہا کہ کووڈ مثبت کیسز میں نمایاں اضافہ ہوا ہے، اسپتالوں میں روزانہ مریضوں کے داخلے ہورہے ہیں، انتہائی نگہداشت والے افراد بھی تیزی سے بڑھ رہے ہیں۔ اسد عمر نے خبردار کیا کہ اگر لوگوں کی جانب سے احتیاطی تدابیر(ایس او پیز) پر عملدرآمد بہتر نہیں ہوا تو ہم ان کی سرگرمیوں پر سخت پابندیاں لگانے پر مجبور ہوں گے۔ اسد عمر نے اپیل کی کہ لوگ بہت زیادہ احتیاط کریں، اب کی بار کورونا کی نئی لہر پہلے سے زیادہ مہلک ہے اور بہت تیزی سے پھیل رہی ہے۔

شیئر کریں

Top