طالبان زیرِزمین چھپائی گئی ملا عمر کی گاڑی منظرعام پر لے آئے

3-1.jpg

کابل: افغانستان میں چھپائی گئی طالبان کے بانی ملا عمر کے زیر استعمال رہنے والی گاڑی کو طالبان حکومت منظر عام پر لے آئی۔
سماجی رابطے کی ویب سائٹ ٹوئٹر پر طالبان حکومت سے وابستہ ایک عہدیدار محمد جلال نے اپنی ٹوئٹ میں زمین کھود کر ایک گاڑی کو نکالنے کی تصاویر شیئر کی ہیں۔
جس میں دیکھا جا سکتا ہے کہ گاڑی کو محفوظ رکھنے کے لیے اسے پلاسٹک شیٹ سے بھی ڈھکا گیا تھا۔ ٹوئٹ میں دعویٰ کیا گیا ہے کہ یہ گاڑی طالبان کے بانی ملا عمر کے زیر استعمال رہی ہے۔
محمد جلال نے اپنی ٹوئٹ میں مزید لکھا کہ مرحوم امیر ملا عمر امریکی حملے کی شروعات کے دوران قندہار سے زابل کے سفر کے لیے یہی ویگو گاڑی استعمال کیا کرتے تھے۔

ملک کی تعمیرنو اور بحالی کیلیے 750 ارب ڈالرکی ضرورت ہوگی، یوکرینی صدر

2.jpg

کیف: یوکرین کے صدر وولودیمیر زیلنسکی نے جنگ سے تباہ حال ملک کی بحالی اور تعمیر نو کے لیے حکومت نے 750 ارب ڈالر کا قومی بحالی پروگرام پیش کردیا۔

عالمی خبر رساں ادارے کے مطابق یوکرین کے صدر وولودیمیر زیلنسکی نے سوئٹزرلینڈ میں 40 سے زائد ممالک اور عالمی اداروں کے دو روزہ یوکرین ریکوری کانفرنس سے ورچوئل خطاب کیا۔ مشاورتی اجلاس کا انعقاد روس کے حملوں سے تباہ حال یوکرین کی تعمیر اور ترقی کے لیے کیا گیا تھا۔

صدر وولودیمیر زیلنسکی نے اپنے خطاب میں کہا کہ روس نے جنگ مسلط کرکے یوکرین کو تباہ کردیا ہے۔ ملک کی تعمیر نو اور بحالی اب پوری جمہوری دنیا کا مشترکہ فریضہ ہونا چاہیے۔
یوکرین کے صدر نے جنگ کے خاتمے کے بعد ملک کی تعمیر نو کے لیے ساڑھے سات ارب ڈالر کا منصوبہ پیش کرتے ہوئے کہا کہ دوسری عالمی جنگ کے بعد یورپ کی تعمیر نو کے لیے ایسا ہی منصوبہ بنایا گیا تھا۔

اجلاس میں جنگ کے خاتمے کے فوری بعد یوکرین کی تعمیر نو کے آغاز سے متعلق تجاویز پیش کی گئی اور ایک مشترکہ لائحہ عمل تیار کرنے پر زور دیا گیا جس سے جنگ زدہ ملک کے زخموں کو بھرا جا سکے۔

رواں برس غلاف کعبہ یکم محرم کو تبدیل کیا جائے گا

1-1.jpg

مکہ مکرمہ: رواں سال غلاف کعبہ نو ذوالحج کے بجائے یکم محرم الحرام کو تبدیل کیا جائے گا۔
حرمین شریفین کے امورکے نگراں ادارے کے مطابق غلاف کعبہ یکم محرم الحرام کو تبدیل کیا جائے گا۔ ہر سال نو ذوالحج کو غلاف کعبہ تبدیل کیا جاتا ہے تاہم رواں سال عازمین حج کی بڑی تعداد کے پیش نظر غلاف کعبہ یکم محرم الحرام کو تبدیل کرنے کا فیصلہ کیا گیا ہے۔
دوسری جانب حج سیکورٹی کے کمانڈر نے میڈیا بریفنگ میں کہا کہ حج کے دوران نظم وضبط کو یقینی بنانے اورکسی بھی ناخوشگوار صورتحال سے بچنے کے لئے مقامات مقدسہ میں سیکورٹی فورسزنے سیکورٹی حصارقائم کردیا ہے۔ قوانین کی خلاف ورزی کرنے والوں کیخلاف کارروائی کی جائے گی۔

مودی نے حیدرآباد دکن کا نام بھی تبدیل کرنے کا عندیہ دیدیا

147.jpg

نئی دہلی: تاریخی شہر الہٰ آباد کا نام تبدیل کرکے پریاگ راج رکھنے والی مودی سرکار اب حیدرآباد دکن کا نام بھی تبدیل کرنا چاہتی ہے۔

بھارتی میڈیا کے مطابق حکمراں جماعت کی جانب سے ملک کے مسلم ناموں والے شہروں کے نام کو تبدیل کرنے کا سلسلہ جاری ہے۔ بھارتی وزیراعظم نریندر مودی نے تقریر کے دوران حیدرآباد کو ’’بھاگیہ نگر‘‘ قرار دیدیا۔

بی جے پی کے رہنما روی شنکر پرساد نے اپنے وزیراعظم کے بیان کی حمایت کرتے ہوئے کہا کہ حیدرآباد بھاگیہ نگر ہے جو ہم سب کے لیے اہمیت کا حامل ہے۔ آزادیٔ ہند کے رہنما سردار پٹیل نے متحد ہندوستان کی بنیاد رکھی اور اب اسے آگے لے جانے کی بی جے پی کی ذمہ داری ہے۔

اتر پردیش کے وزیر اعلیٰ یوگی آدتیہ ناتھ نے بھی 2020 میں گریٹر حیدرآباد میونسپل کارپوریشن کے انتخابات کے دوران ووٹروں سے پارٹی کو ووٹ دینے کی اپیل کی تھی تاکہ حیدرآباد کو بھاگیہ نگر میں تبدیل کیا جا سکے۔

اس سے قبل انتہا پسند ہندو جماعت ’’آر ایس ایس‘‘ اور حکمراں جماعت بی جے پی کے مقامی قائدین بھی حیدرآباد کا نام بدل کر بھاگیہ نگر رکھنے کا مطالبہ کرتے رہے ہیں۔

اسی طرح مرکزی وزیر پیوش گوئل نے بھی کہا تھا کہ جب ریاست میں بی جے پی اقتدار میں آئے گی تو چیف منسٹر کابینہ کے ساتھیوں کے ساتھ مل کر حیدر آباد کا نام تبدیل کرنے کا فیصلہ کریں گے۔

خیال رہے کہ بھارتیہ جنتا پارٹی نے اپنی جماعت کے ایک اہم اجلاس کے لیے پہلی بار نئی دہلی کے بجائے حیدرآباد میں کر رہی ہے جس سے اس بات کو تقویت ملتی ہے کہ حکمراں جماعت حیدرآباد سے متعلق کوئی بڑا فیصلہ کرنے جا رہے ہیں۔

طاقتور سمندری طوفان نے بحری جہاز کے دو ٹکڑے کردیئے؛ 12 ہلاک

2344595-shipdividedintotwopicesbystorm-1656947577-891-640x480-1.jpg

بیجنگ: ہانگ کانگ میں طاقتور طوفان کے باعث دو ٹکڑوں میں تقسیم ہوجانے والا بحری جہاز سمندر میں ڈوب گیا جس کے نتیجے میں 12 افراد ہلاک اور 30 لاپتہ ہوگئے۔

عالمی خبر رساں ادارے کے مطابق ہانگ کانگ میں ڈوبنے والے بحری جہاز سے 12 لاشیں ملی ہیں جب کہ 30 افراد اب بھی لاپتہ ہیں۔ امدادی کاموں میں ہیلی کاپٹرز، کشییاں اور کوسٹ گارڈ کے غوطہ خور حصہ لے رہے ہیں۔

چین کے کوسٹ گارڈ کے ترجمان کا کہنا ہے کہ امدادی کاموں کے دوران 3 افراد کو زندہ نکالا گیا جب کہ 30 افراد کی تلاش کا کام جاری ہے تاہم ان کے زندہ ملنے کے امکانات معدوم ہوگئے ہیں۔

 

خیال رہے کہ یہ بحری جہاز سمندر کے بیچوں بیچ تھا جب طاقتور طوفان نے آن گھیرا۔ طوفان اتنا طاقتور تھا کہ بحری جہاز کے دوٹکڑے گئے اور دونوں سمندر میں ڈوب گئے۔

لینڈ سلائیڈنگ میں بھارتی فوج کا کیمپ تباہ؛ ہلاکتیں 34 ہوگئیں

2343269-indianarmypostdestroyedinlandslidingkilled-1656839670-402-640x480-1.jpg

نئی دہلی: بھارتی ریاست منی پور میں تین دن قبل مٹی کا تودہ گرنے سے بھارتی فوج کا کیمپ تباہ ہوگیا تھا جس کے ملبے تلے دب کر ہلاک ہونے والوں کی تعداد 34 ہوگئی جس میں سے 26 بھارتی فوج کے اہلکار ہیں۔

بھارتی میڈیا کے مطابق ریاست منی پور میں تین روز قبل امپھال جریبام ریلوے پروجیکٹ میں تعمیراتی کام کے دوران مٹی کا بڑا تودہ آن گرا تھا۔ پروجیکٹ کی حفاظت کے لیے قائم کی گئی فوجی چیک پوسٹ لینڈ سلائیڈنگ میں تباہ ہوگئی تھی۔

مٹی کا تودہ گرنے سے ملبے تلے 100 سے زائد اہلکار دب گئے تھے۔ ریسکیو ادارے نے پہلے روز امدادی کاموں کے دوران 8 افراد کی لاشیں نکالی تھیں جن میں سے ایک ریلوے ملازم اور 7 فوجی اہلکار تھے۔
تاہم 3 روز میں امدادی کاموں کے دوران اب تک 34 لاشیں نکالی جا چکی ہیں جن میں سے 26 ٹیریٹوریل آرمی کے اہلکار ہیں۔ اسی طرح 13 آرمی اہلکاروں اور 5 سویلین کو زخمی حالت میں نکالا گیا ہے۔

اب بھی 28 افراد ملبے تلے دبے ہوئے ہیں تاہم ان کے زندہ بچ جانے کے امکانات معدوم ہوگئے ہیں۔

وزارت دفاع کے پبلک ریلیشن آفیسر کی جانب سے جاری بیان میں بتایا گیا ہے کہ ریلوے پروجیکٹ کی حفاظت پر مامور ٹیم فوجی رضاکاروں پر مشتمل ٹریٹوریل آرمی کی ٹیم کر رہی تھی۔

یہ فوجی رضاکار سویلین ہوتے ہیں اور مختلف شعبہ ہائے زندگی سے تعلق رکھنے ہیں اور رضاکارانہ طور پر فوج میں بھرتی ہوتے ہیں۔

بیوی پرتشدد کے ملزم کی گرفتاری کیلیے آنے والی پولیس ٹیم پر فائرنگ؛ 3 ہلاک

2344212-americashootingkilledpolicemen-1656855794-318-640x480-1.jpg

 

کینٹکی: امریکا میں گھریلو تشدد کی شکایت پر گرفتاری کے لیے جانے والی پولیس پارٹی پر ملزم نے اندھا دھند فائرنگ کردی جس کے نتیجے میں 3 پولیس افسران اور محکمے کا تربیت یافتہ جاسوس کتا ہلاک ہوگیا۔

امریکی خبر رساں ادارے کے مطابق ریاست کینٹکی کے پہاڑی علاقے میں نیم آباد علاقے سے پولیس کو ایک شکایت موصول میں ہوئی جس میں کہا گیا کہ ایک 49 سالہ شخص خاتون کو گھریلو تشدد کا نشانہ بنانا رہے۔

خاتون کی شکایت پر پولیس پارٹی جب گھر پر پہنچی تو ملزم نے سخت مزاحمت کی اور تین گھنٹے تک پولیس کے ساتھ فائرنگ کا تبادلہ جاری رہا۔ اس دوران 3 پولیس افسران ہلاک ہوگئے جب کہ ڈپارٹمنٹ کا تربیت یافتہ کتا بھی مارا گیا۔
پولیس پارٹی کی مدد کو مزید نفری بھی بھیجی گئی۔ فائرنگ کے تبادلے میں 4 افراد زخمی بھی ہوئے جن میں پولیس اہلکار بھی شامل ہیں۔بعد ازاں ملزم نے اہل خانہ کے سمجھانے پر گرفتاری دیدی۔

بھارت سے آزادی کیلئے سکھوں کا اٹلی میں ریفرنڈم، خالصتان کا نیا نقشہ جاری

2344227-sikh-1656858852-963-640x480-1.jpg

روم: سکھ برادری نے اقلیتوں پر مظالم ڈھانے والے بھارت سے آزادی حاصل کرنے کے لیے ریفرنڈم کا انعقاد کیا، جس میں الگ وطن کا خالصتان کا نیا نقشہ بھی جاری کیا گیا۔

ذرائع کے مطابق بھارت سے آزادی کے لیے سکھ فار جسٹس کے زیر اہتمام یورپی یونین کے رکن ملک اٹلی کے دارالحکومت روم میں خالصتان ملک کے قیام کیلیے ریفرنڈم کا انعقاد کیا گیا جس میں سکھوں نے بھارت سے آزادی کا مطالبہ کیا۔

ریفرنڈم کے دوران سکھ رہنماؤں کی جانب سے الگ وطن خالصتان کا نیا نقشہ بھی جاری کیا گیا، جس میں بھارتی ریاست پنجاب کے علاوہ ہریانہ، ہماچل پردیش، راجستھان اور یو پی کے اکثر اضلاع کو بھی شامل کیا گیا ہے۔
سکھ رہنما پرم جیت سنگھ کا کہنا تھا کہ گلوکار سدھو موسے والا کو بھارتی ایجنسیوں نے قتل کروایا کیوں کہ وہ بھارتی پنجاب کی آزادی کے بڑے حامی تھے۔

سکھ فار جسٹس کے بانی پرم جیت سنگھ کا مزید کہنا تھا کہ گلوکار سدھو موسے والا کے قتل کے پیچھے بھارتی حکومت ہی ہے۔

بھارت میں مسافر بردار طیارہ حادثے سے بال بال بچ گیا؛ ہنگامی لینڈنگ

2344180-indianplaneemergencylanding-1656848130-983-640x480-1.jpg

نئی دہلی: بھارتی دارالحکومت سے جبل پور جانے والا مسافر بردار طیارہ پائلٹ کی حاضر دماغی کے باعث بڑے حادثے سے بال بال بچ گیا۔
بھارتی میڈیا کے مطابق نئی دہلی سے جبل پور جانے والے مسافر بردار طیارے کو ٹیک آف کے فوری بعد ہی ہنگامی لینڈنگ کرنا پڑی۔ کنٹرول ٹاور کو پائلٹ کی جانب سے انتہائی ایمرجنسی کے وقت دیا جانے والا پیغام ’’مے ڈے کال‘‘ موصول ہوئی تھی۔
طیارے کو ہنگامی لینڈنگ کے بعد خالی کرالیا گیا۔ تمام مسافر اور عملہ خیریت سے ہیں۔ مسافروں کو دوسری پرواز کے ذریعے جبل پور روانہ کردیا گیا۔
ایئرلائن کمپنی کی جانب سے جاری بیان میں کہا گیا ہے کہ طیارے کے ٹیک آف کے فوری بعد کیبن میں دھواں بھرگیا جس پر پائلٹ نے حاضر دماغی کا مظاہرہ کرتے ہوئے فوری طور پر ہنگامی لینڈنگ کی اجازت طلب کی۔
ایوی ایشن کے ترجمان کا کہنا ہے کہ ابتدائی تحقیقات میں کیبن میں دھواں بھرجانے کی وجہ طیارے کے بائیں انجن سے تیل کا اخراج معلوم ہوا ہے تاہم حتمی طور انکوائری مکمل ہونے پر کچھ کہا جا سکتا ہے۔

لیبیا میں مشتعل مظاہرین نے پارلیمنٹ پر دھاوا بول دیا

2344149-protestorsattackonlibyaparliment-1656846123-183-640x480-1.jpg

طرابلس: لیبیا میں مشتعل مظاہرین مشرقی پارلیمنٹ کا دروازہ توڑ کر اندر داخل ہوگئے اور توڑ پھوڑ کی جب کہ عمارت کے کچھ حصے کو آگ لگا دی گئی۔
عالمی خبر رساں ادارے کے مطابق لیبیا میں مشتعل مظاہرین نے وزیراعظم ہونے کے دعویدار فتح بشاگا کے زیر استعمال مشرقی پارلیمنٹ پر دھاوا بول دیا تاہم حملے کے وقت عمارت مکمل طور پر خالی تھی۔
کئی ہفتوں سے مظاہرین خودساختہ حکومت کو تحلیل کرنے کا مطالبہ کررہے تھے تاہم مطالبہ پورا نہ ہونے پر پارلیمنٹ کا دروازہ توڑ کر اندر داخل ہوگئے اور تھوڑ پھوڑ کی۔ مشتعل ہجوم نے عمارت کے کچھ حصوں کو آگ بھی لگا دی۔
خیال رہے کہ اس وقت لیبیا میں دو حکومتیں ہیں ایک نگراں وزیراعظم عبدالحمید ہیں جو مغربی لیبیا کے شہر طرابلس میں مقیم ہیں۔ انھیں اقوام متحدہ نے تنازع کے حل اور نئے الیکشن کرانے تک نگراں وزیراعظم مقرر کیا تھا۔
دوسری جانب فتح بشاگا ہے جو مشرقی لیبیا میں مقیم ہیں اور اقوام متحدہ کے مقرر کردہ نگراں وزیراعظم کو تسلیم کرنے سے انکار کرتے ہوئے حکومت چھوڑنے سے انکار کردیا تھا اور طبرق شہر میں موجود پارلیمنٹ پر قابض ہیں۔

 

Top