بابراعظم نے آئی سی سی رینکنگ سے متعلق اپنی خواہش ظاہر کردی

14.jpg

لاہور: قومی کرکٹ ٹیم کے کپتان بابراعظم نے آئی سی سی کی ون ڈے اور ٹی20 رینکنگ میں ٹاپ پوزیشن حاصل کرنے بعد ٹیسٹ فارمیٹ میں نمبر ون بننے کی خواہش کا اظہار کردیا۔
پریس کانفرنس میں صحافیوں سے گفتگو کرتے ہوئے قومی ٹیم کے کپتان بابراعظم نے کہا کہ کرکٹ کے تینوں فارمیٹس میں پاکستان کے لیے پہلی پوزیشن حاصل کرنا کسی فخر سے کم نہیں، میری کوشش ہوگی جلد از جلد یہ کارنامہ سرانجام دوں جس کے لیے سخت محنت کررہا ہوں۔
قومی ٹیم کے 27 سالہ کپتان آئی سی سی رینکنگ ون ڈے اور ٹی20 فارمیٹس کی پہلی پوزیشن پر قابض ہیں جبکہ ٹیسٹ میں انکا چوتھا نمبر ہے، انگلیںڈ کے سابق کپتان جو روٹ پہلے، مارنس لیبوشین دوسرے، آسٹریلوی ٹیم کے سابق کپتان اسٹیو اسمتھ تیسرے نمبر پر براجمان ہیں۔
واضح رہے کہ قومی ٹیم دو ٹیسٹ میچز کی سیریز کے لیے آج دورہ سری لنکا پر روانہ ہوگی، اس دوران بابراعظم کے پاس اپنی رینکنگ بہتر بنانے کا موقع ہوگا۔

انگلینڈ کی سیکیورٹی ٹیم اگلے ہفتے پاکستان پہنچے گی، رپورٹ

13.jpg

لاہور: پاکستان کے خلاف سات ٹی20 میچز پر مشتمل سیریز سے قبل انگلینڈ کرکٹ بورڈ (ای سی بی) کی سیکیورٹی ٹیم اگلے ہفتے پاکستان پہنچے گی۔
میڈیا رپورٹس کے مطابق انگلینڈ کی سیکیورٹی ٹیم ہوٹل ک اطراف اور اسٹیڈیم کے راستے سمیت دیگر انتظامات کا جائزہ لے گی، سیریز کا انعقاد تین شہروں راولپنڈی، لاہور اور کراچی میں ہونے کا امکان ہے تاہم ابھی تک اس کی کوئی باضابطہ تصدیق نہیں کی گئی۔

رپورٹ میں بنایا گیا ہے کہ انگلش بورڈ کی سیکیورٹی ٹیم ملتان کرکٹ اسٹیڈیم کا بھی دورہ کرے گی کیونکہ پی سی بی کچھ میچز ملتان میں شیڈول رکھنے کا خواہاں ہے تاہم تین شہروں میں دو مقامات پر سیریز کھیلنے کی توقع کی جارہی ہے۔
انگلینڈ کی کرکٹ ٹیم 15 ستمبر کو پاکستان کا دورہ کرے گی جبکہ تین ہفتوں پر متشمل دورے کے دوران پاکستان 7 میچز کی میزبانی کرےگا۔

کم عمر ترین کوہ پیما شہروز کاشف نے نانگاپربت چوٹی سر کرلی

12.jpg

لاہور: دنیا کے کم عمر ترین کوہ پیما شہروز کاشف نے نانگا پربت چوٹی سر کرلی۔
لاہور سے تعلق رکھنے والے شہروز نے 8ہزار 126 میٹر چوٹی پر صبح پونے 9 بجے قومی پرچم لہرایا۔شہروز نے 8 ہزار میٹر بلند آٹھویں چوٹی سر کی ہے۔
شہروز کاشف کے والد سلمان نے نانگا پربت سر کرنے کی تصدیق کرتے ہوئے کہا ہے کہ شہروز دنیا کی تمام 14 آٹھ ہزار میٹر بلند چوٹیاں سر کرنے کا عزم رکھتے ہیں۔وہ خطرناک ترین چوٹی کے ٹو اور ماونٹ ایورسٹ پر پہلے ہی پاکستانی پرچم لہرا کرچکے ہیں۔
واضح رہے کہ شہروز کاشف کے والد نے ایکسپریس نیوز کو دیے گئے خصوصی انٹرویو میں حکومتی سپورٹ نہ ہونے کا شکوہ بھی کیا تھا۔ ان کا کہنا تھا کہ کامیابیوں کا کریڈٹ سب لیتے ہیں لیکن حکومت کی طرف سے جو سپورٹ ملنی چاہیے، وہ کوئی نہیں کرتا۔

جونیئر لیگ مینٹورشعیب ملک قومی ٹیم کو دستیاب

11.jpg

کراچی: پاکستان جونیئر لیگ کا مینٹور بننے کے باوجود شعیب ملک قومی ٹیم کو بطور کرکٹر بدستور دستیاب ہیں۔

شعیب ملک نے آخری بار گذشتہ برس نومبر میں میرپور میں بنگلہ دیش کیخلاف پاکستانی شرٹ زیب تن کی تھی، اس کے بعد سے وہ انٹرنیشنل کرکٹ سے دور ہیں،ان کی کپتان بابر اعظم سے مفاہمت کے مطابق جہاں ضرورت ہوانھیں قومی ٹیم کیلیے بلایا جا سکتا ہے۔

فروری میں شعیب پی ایس ایل 7میں پشاور زلمی کی نمائندگی کرتے ہوئے 401رنز بنا کر ایونٹ کے چوتھے کامیاب بیٹر ثابت ہوئے تھے،ان سے پہلے موجود تینوں کھلاڑی اوپنرز تھے، اس کے بعد سے وہ مسابقتی کرکٹ میں شریک نہیں ہوئے، البتہ ٹریننگ،نیٹ سیشنز اور لوکل میچز میں شرکت کا سلسلہ جاری ہے۔
گزشتہ دنوں پی سی بی کی جانب سے انھیں جاوید میانداد،شاہد آفریدی اور ڈیرن سیمی کے ساتھ پاکستان جونیئر لیگ کا مینٹور مقرر کرنے کا اعلان سامنے آیا، اس سے یہ قیاس آرائیاں ہونے لگیں کہ شاید شعیب ملک بطور کرکٹر اپنے مستقبل سے مایوس ہو گئے اور اب کوچنگ کا کیریئر اپنائیں گے،البتہ حقائق اس کے برعکس اور وہ بدستور انٹرنیشنل کرکٹ کھیلنا چاہتے ہیں۔

اس حوالے سے رابطے پر پی سی بی کے ڈائریکٹر میڈیا سمیع الحسن برنی نے کہا کہ شعیب ملک ابھی انٹرنیشنل کرکٹ سے ریٹائر نہیں ہوئے لہذا قومی ٹیم کی سلیکشن کیلیے دستیاب ہیں، اگر سلیکٹرز نے انھیں ٹوئنٹی 20 ورلڈکپ کیلیے منتخب کر لیا تو ہم پی جے ایل میں کسی متبادل مینٹور کا تقرر کریں گے۔

واضح رہے کہ ورلڈکپ کا آغاز 16 اکتوبر سے ہوگا جبکہ پاکستان جونیئر لیگ کی مجوزہ تاریخیں یکم سے 15 اکتوبر ہیں، میگا ایونٹ کے قریبی تاریخوں میں انعقاد کی وجہ سے ہی بطور مینٹور بعض بڑے غیرملکی کھلاڑیوں کی خدمات حاصل نہ کی جا سکیں جو کمنٹری یا دیگر مصروفیات کی وجہ سے دستیاب نہ تھے۔

شاہین شاہ آفریدی کے پی پولیس کے خیرسگالی سفیر مقرر

2344472-shaheenshahafridi-1656926642-431-640x480-1.jpg

پشاور: قومی کرکٹ ٹیم کے نوجوان کھلاڑی فاسٹ بولر شاہین شاہ آفریدی کو خیبر پختونخوا پولیس کا اعزازی خیرسگالی سفیر مقرر کردیا گیا۔

پولیس لائنز پشاور میں تقریب کا انعقاد کیا گیا، جس میں قومی کرکٹر کے پی پولیس کی وردی پہن کر شریک ہوئے۔ اس موقع پر شاہین شاہ آفریدی کو اعزازی ڈی ایس پی کے اعزازی بیجز بھی لگائے گئے۔ قومی کھلاڑی نے پولیس وردی میں سب سے پہلے اپنے والد کو سلامی پیش کی۔

تقریب سے خطاب کرتے ہوئے شاہین شاہ آفریدی کا کہنا تھا کہ اصل سپر اسٹار ہماری فورسز ہیں ۔ مجھے کے پی پولیس کا سفیر بننے پر فخر ہے ۔ میرے والد بھی 25 سال تک پولیس فورس کا حصہ رہے ہیں۔ انہوں نے کہا کہ بہادرپولیس فورس نے ملک و قوم کے لیے بہت قربانیاں دی ہیں۔

 

چیف سیکرٹری خیبر پختونخوا نے تقریب سے خطاب کرتے ہوئے کہا کہ گھٹن زدہ ماحول میں ایسے ایونٹ کا انعقاد قابل تعریف ہے ، شاہین شاہ آفریدی ہمارا فخر اور اسٹار ہیں۔

انسپکٹر جنرل کے پی پولیس معظم جاہ انصاری نے تقریب سے خطاب کرتے ہوئے کہا کہ 2022 کے 6 ماہ کے دوران پولیس کے 54 آفیسرز اور جوانوں نے شہادت کا رتبہ پایا ۔ شاہین شاہ آفریدی کے سفیر منتخب ہونے سے خیبر پختونخوا پولیس کی قربانیوں کو اجاگر کرنے میں مدد ملے گی۔

آئی جی پولیس نے  مزید کہا کہ شاہین شاہ آفریدی کی خدمات قابل ستائش ہیں ۔ پولیس سماج دشمن عناصر کے چھکے چھڑائے گی اور شاہین شاہ کرکٹ کے میدان میں چھکے لگائیں گے۔ انہوں نے کہا کہ شاہین شاہ آفریدی پولیس کی کامیابیوں اور خدمات میں ساتھ کھڑے ہوں گے۔

بورڈ اور فرنچائزز میں تلخیوں کی برف پگھلنے لگی

unnamed-file.jpg

کراچی: بورڈ اور فرنچائززمیں تلخیوں کی برف پگھلنے لگیں، تقریبا10 ماہ بعد آئندہ ہفتے گورننگ کونسل کا اجلاس طلب کرنے کا عندیہ دے دیا۔

پی ایس ایل کی گورننگ کونسل میں چیئرمین بورڈ رمیز راجہ کی زیرسربراہی تمام ٹیم اونرز شامل ہیں،اس کا آخری اجلاس 27 ستمبر 2021کو لاہور میں ہوا تھا، اس کے بعد اعلیٰ حکام کی مصروفیات آڑے آتی رہیں، پھر بعض فرنچائز آفیشلز کے سخت بیانات نے پی سی بی کو ناراض کر دیا اور گورننگ کونسل میٹنگ کا انعقاد نہ ہو سکا۔

بورڈ کا کہنا تھا کہ ٹیم مالکان اور آفیشلز اس پر تنقید نہیں کر سکتے،اس حوالے سے ایک ضابطہ اخلاق بننا چاہیے جس کے تحت اگر کوئی ایسا کرے تو اس کیخلاف سخت ایکشن لیا جا سکے، فرنچائزز نے اس پر عدم اتفاق کا اظہار کیا، ان کے مطابق پہلے ہی معاہدے میں کوڈ آف کنڈکٹ بھی درج ہے، اب ایسی کوئی ضرورت نہیں، ویسے بھی وسیم اکرم یا ان جیسے کسی سابق کرکٹر کو کیسے بیانات دینے سے روکا جا سکتا ہے۔
ذرائع نے بتایا کہ اس حوالے سے اب برف پگھلنے لگی، پی سی بی تقریبا 10 ماہ بعد گورننگ کونسل کا اجلاس طلب کرنے پر آمادہ ہو گیا، اس حوالے سے فرنچائز مالکان سے دستیابی معلوم کر لی گئی، انھیں 7 جولائی تک کسی تاریخ کے انتخاب کا کہا گیا ہے۔

ہاکی ٹیم کے نائب کپتان کی مالی پریشانیوں کے سبب کیمپ جوائن کرنے سے معذرت

2344183-hockey-1656847478-416-640x480-1.jpg

لاہور: قومی ہاکی ٹیم کے نائب کپتان علی شان نے مالی پریشانیوں کے سبب کیمپ میں شرکت سے معذرت کرلی۔
ذرائع کے مطابق قومی ہاکی ٹیم کے نائب کپتان علی شان کا کہنا ہے کہ کیمپ میں شرکت نہ کرنے کی وجہ کھیل پر فوکس نہ ہونا ہے، گھریلو پریشانیوں کے باعث کھیل سے بریک لیا ہے۔
نائب کپتان کا کہنا ہے کہ پاکستان ہاکی فیڈریشن (پی ایچ ایف) کے سیکرٹری اسپورٹس آصف باجوہ سے ملاقات میں آرام کا وقت مانگا تھا، ہاکی کے لیے اپنی تعلیم ادھوری چھوڑی تھی تاہم ڈیپارٹمنٹ خٹم ہونے کے سے ذہنی پریشانیوں میں اضافہ اور حالات مشکل ہورہے ہیں۔
پی ایچ ایف سیکرٹری آصف باجوہ کا کہنا ہے کہ علی شان نے بریک مانگا ہے لیکن مالی پریشانیوں کا ذکر نہیں کیا، اگلے ہفتے ان سے دوبارہ ملاقات کروں گا۔

دوسری جانب سیکرٹری اسپورٹس بورڈ پنجاب اسد اللہ فیض نے قومی ہاکی ٹیم کے نائب علی شان کی پریشانیوں کا علم ہونے پر وظیفہ دینے کا اعلان کیا ہے۔

کشمیر پریمئیر لیگ میں نئی فرنچائز کا اضافہ ہوگیا

2343994-kpl-1656825214-982-640x480-1.jpg

کشمیر پریمئیر لیگ (کے پی ایل) کے دوسرے سیزن کیلئے ایک نئی فرنچائز کا اضافہ ہوگیا۔
کشمیر پریمئیر لیگ کے ترجمان کا کہنا ہے کہ ٹورنامنٹ کے دوسرے ایڈیشن میں ایک نئی ٹیم کا اضافہ کیا گیا ہے، جس کے بعد 7 ٹیمیں ٹائٹل کی جنگ لڑیں گی۔
ٹورنامنٹ کی ڈرافٹنگ عید الضحیٰ کے بعد ہوگی جبکہ کے پی ایل میں نئی شامل ہونے والی فرنچائز جموں جانباز ہے۔
رپورٹس کے مطابق پاکستان کر کرٹ بورڈ (پی سی بی) نے کشمیر پریمئیر لیگ (کے پی ایل) سیزن 2 کا این او سی جاری کردیا ہے۔
کشمیر پریمئیر لیگ کی ٹیمیں:
جموں جانباز، راولاکوٹ ہاکس، مظفرآباد ٹائیگرز، باغ اسٹالینز، میرپور رائلز، کوٹلی لائنز اور اوور سیز واریئرز شامل ہے۔

لیجنڈری کرکٹر ظہیر عباس کو طبیعت بہتری پر وینٹی لیٹر سے ہٹا دیا گیا

2343903-zahir-1656779395-643-640x480-1.jpg

لندن: برطانیہ میں زیر علاج قومی کرکٹ ٹیم کے لیجنڈری کرکٹر ظہیر عباس کو طبیعت بہتر ہونے پر ڈاکٹرز نے وینٹی لیٹر سے ہٹا دیا۔
میڈیا رپورٹ کے مطابق ظہیر عباس برطانوی دارالحکومت لندن کے نجی اسپتال میں زیر علاج ہیں، ڈاکٹروں نے طبیعت میں بہتری آنے پر سابق کرکٹر کو وینٹی لیٹر سے ہٹا دیا تاہم وہ انتہائی نگہداشت وارڈ(آئی سی یو) میں رہیں گے۔
ایشن ڈان بریڈ مین کے نام سے مشہور اور آئی سی سی کے سابق صدر ظہیر عباس لندن آمد سے قبل دبئی میں کورونا کا شکار ہوئے تھے، جس کے بعد سے اُن کی طبیعت مسلسل خراب رہی اور گزشتہ دنوں اُن کی حالت تشویشناک ہوگئی تھی۔
لیجنڈری کرکٹر کے اہل خانہ نے مداحوں سے ظہیرعباس کی صحت یاب کیلئے دعاؤں کی بھی اپیل کی۔
خیال رہے کہ 74سالہ ظہیر عباس نے اپنے کیریئر میں 78 ٹیسٹ اور 62 ون ڈے میچز میں پاکستان کی نمائندگی کی، اس دوران انہوں نے کئی یادگار اننگز کھیلیں۔

سرفراز، فواد کی کیٹیگریز میں تنزلی پر سابق فاسٹ بولر کی کڑی تنقید

2343645-sarfarazandfawadalam-1656740934-212-640x480-1.jpg

کراچی: قومی کرکٹ ٹیم کے سابق فاسٹ بولر تنویر احمد نے پاکستان کرکٹ بورڈ (پی سی بی) جانب سے سینٹرل کنٹریکٹ میں سرفراز احمد کو ڈی کیٹیگری میں رکھنے پر سوال اٹھا دیئے۔
سابق فاسٹ بولر تنویر احمد یوٹیوب چینل پر پی سی بی کو تنقید کا نشانہ بناتے ہوئے کہا کہ سرفراز احمد چیمپئنز ٹرافی وننگ ٹیم کے کپتان ہیں، انہیں سینٹرل کنٹریکٹ کی ڈی کیٹیگری میں ڈالنا تضحیک آمیز رویہ ہے۔
تنویر احمد نے سابق کپتان سرفراز احمد سے بھی سوال کیا کہ وہ پی سی بی کے اس رویے پر کیوں خاموش ہیں، جو کرکٹرز سرفراز کی ٹیم کا حصہ تھے وہ اے، بی کیٹیگریز میں شامل ہیں جبکہ انہیں ڈی میں رکھا گیا ہے۔
سابق فاسٹ بولر نے فواد عالم کو کیٹیگری بی میں رکھنے کے فیصلے پر بھی سوال اٹھاتے ہوئے کہا کہ وہ صرف ٹیسٹ فارمیٹ کھیلتے ہیں اور ان کی کارکردگی کو دیکھیں، انہیں بی کیٹیگری میں کنٹریکٹ دینا ناانصافی ہے۔
انہوں نے الزام عائد کیا کہ چیف سیلکٹر محمد وسیم نے دوستوں نوازا اور سہولت فراہم کی، ورنہ فواد کو ریڈ بال فارمیٹ کے معاہدوں کی اے کیٹیگری میں ہونا چاہیے تھا۔

Top